سىرباي ماۋلەننىڭ ولەڭدەرى
اقىننىڭ «شاڭقاي ءتۇس»، «سوعىستان قايتقان سولداتتار»، «قۇلىن»، «اق ءتۇن»، «بيىلعى جاز داڭبىر بوپ ءوتتى»، «ءدىرىل» سەكىلدى شىعارمالار بەرىلدى.
شاڭقاي ءتۇس
مۇز بوپ قاتقان التى اي قىس
كول قۇشاعىن قازعا اشقان.
شاعالاداي شاڭقاي ءتۇس،
جاتىر ەرىپ جازعى اسپان.
كوزگە استە شالىنباي،
سيقىرلى ءبىر جاڭبىر بوپ،
قىستىڭ قالعان قارىنداي
ەريدى اسپان اق نۇر بوپ.
جەر مەن كوككە جاعالاي
شۇعىلاسىن قۇيىپ تەڭ،
مارحاباتتى اناداي
كۇن قارايدى بيىكتەن.
بالقىتىپ وت سەزىمگە
بۇل دۇنيەنىڭ وي-قىرىن،
شاڭقاي ءتۇستىڭ كەزىندە
سويلەيدى ءۇنسىز ويلى كۇن.
سوعىستان قايتقان سولداتتار
جاۋتاڭداپ قاراپ دالا تۇر،
كوز جاسىن ءسۇرتىپ جاڭا ءبىر.
حابارسىز ۇلىن سۇراۋعا
جولىڭدى توسىپ انا ءجۇر.
قانشا ءۇيدىڭ ۇرلاپ ادامىن،
قانشا ۇيدە ءسونىپ قالدى وتتار.
كوردىڭ بە ۇلىن انانىڭ،
سوعىستان قايتقان سولداتتار؟!
كەشىكپەي جارىم كەلەر دەپ،
تورىنەن سايلاپ ورىندى،
باتىسقا قاراپ ەلەڭدەپ،
ارۋ ءجۇر توسىپ جولىڭدى.
كوتەردى ءبارىن اۋىردىڭ
ازامات بولىپ اردى اقتار.
كوردىڭ بە جارىن ارۋدىڭ،
سوعىستان قايتقان سولداتتار؟!
كەتەردە سولدات جارىنىڭ
ىشىندە قالعان انا جىل.
«كوكەمدى ايتپاي تانىرمىن»،
دەپ ءبىر ءسابي بالا ءجۇر.
قايرىلماي قالاي كەتەسىڭ،
حابارسىز قالاي ول توقتار.
كوردىڭ بە ونىڭ كوكەسىن،
سوعىستان قايتقان سولداتتار؟!
قارالى قاعاز جىبەرىپ،
قانشاما قايعى سالدى وقتار.
بارادى ءۇنسىز تۇنەرىپ
سوعىستان قايتقان سولداتتار!
قۇلىن
شارشاعان جول باتىپ
ۆولحوۆتىڭ باتپاعىندا،
جاتىر بيە تولعاتىپ
زەڭبىرەكتىڭ ارت جاعىندا.
فۋگاس بومباسى
جەردى ورتەگەن قيىن كۇندە،
تىرشىلىك جولداسى
بۇلكىلدەيدى بيەنىڭ بۇيىرىندە.
ادامداي جاپا شەگىپ قۇسا-مۇڭنان،
ءسابي ءبىر ءۇن ساعىنعان.
جالىن تاراپ، كوزىنە ءۇنسىز قاراپ،
سولدات ونىڭ سيپايدى قۇرساعىنان.
شاشىراعان كوك جالىنىن بۇركىپ
تەمىر، ورماننىڭ ءىشى ۇرەيلى.
ال وتتىڭ ورتاسىندا -
شىركىن ءومىر
قۇلىن بوپ كىسىنەيدى.
اق ءتۇن
اق ءتۇن، اق ءتۇن
الىپ ءبىر اق ساۋىت.
اق بوز اتتىڭ
جالىنداي اقشا بۇلت.
اق ءتۇن - اق گۇل
اينالا تۇتاسقان.
توگىلمەي شاق تۇر
اق مۇحيت - ءسۇت اسپان.
اق ءتۇن - اق جالىن،
اق تۇستەر جايماسى.
دۇنيەنىڭ پاك جانىن
تۇسىرگەن
اق ءتۇن -
رەنتگەن ايناسى.
اق ءتۇن
تاڭ جارىعىنداي
بوزارىپ اعارعان.
اق قايىڭ قابىعىنداي
اق جولدار
جان-جاققا تارالعان.
اق ءتۇن اعادى
پەتردىڭ اق اتىنداي.
اسپاندى جابادى
اققۋدىڭ قاناتىنداي.
اق ءتۇن ورلەپ شاۋىپ،
جەتەدى تۇنەكتىڭ قۋىسىنا.
وينايدى ورنەك سالىپ
سۋۆوروۆ قىلىشىنا.
اق ءتۇن ۋاتىلعان
ايدىڭ ءداۋ قازانى ما؟
اق شاڭ بوپ شۇباتىلعان
جۇلدىزدار توزاڭى ما؟
اق ءتۇن
روسسيا جىرشى ۇلى بوپ
اتانعان كۇن ەلىنە -
كۇناسىز - كىرشىگى جوق
پۋشكيننىڭ جۇرەگى مە؟
اق ءتۇننىڭ اتقارار
جۇمىسى كوپ:
قۇيىلادى
مارتەننىڭ
اق جالىن قۇرىشى بوپ.
وينايدى ول
اق نۇر بولىپ
سۋ تۇبىندە،
قاراعاي بۇرتىگىندە،
جىر جاتتاۋشى
قىزداردىڭ كىرپىگىندە.
اق ءتۇن
اق ساۋلەسىن شاشادى
ءتۇن كۇلكىسىندەي.
اق ءتۇن اسپان توسىن
جەلپيدى
كىر تۇسىرمەي.
اق ءتۇن -
الەمنىڭ اپپاق ادال نۇرى،
اق ءتۇن
قۋادى قۋىستاردان
كولەڭكە،
قاراڭعىنى.
اق ءتۇن -
جەتكەن تالاي جىل بولدىرىپ،
اتالاردىڭ اق ارمانى.
اق ءتۇندى - اق ارماندى
تۇر قوندىرىپ:
لەنينگراد الاڭدارى،
نەۆا ارالدارى،
كرونشتادت قامالدارى،
سمولنىي جالاۋلارى.
بيىلعى جاز جاڭبىر بوپ ءوتتى
بيىلعى جاز جاڭبىر بوپ ءوتتى،
ۇساق بالاپان جاڭبىرلار،
ءمولدىر جاڭبىرلار
تەرەكتەرگە جاۋدى دا كەتتى.
سەنىڭ تولقىن شاشىڭا
سول جاڭبىرلار مەرۋەرتتەي ءتىزىلىپ قالدى.
ەسىڭدە مە، تاۋ باسىندا
كوزىڭنەن ءبىر مونشاق ءۇزىلىپ قالدى.
شىقپايدى ءتىپتى ەسىمنەن،
ول بىلاي ەدى:
كوك توسىنەن
ءمولدىر مونشاقتار
توگىلىپ قۇلاي بەردى،
توگىلىپ قۇلاي بەردى.
سەن پانا ىزدەپ جالعىز ەمەننەن،
قيادا قالدىڭ تۇرىپ.
ءتۇسىپ جاتتى توبەڭنەن
تىرسىلداپ جاڭبىر ۇرىپ.
ەمەننىڭ قابىعىن جاي
سەن وقىس ارشىپ ەدىڭ.
ءتۇسىپ جاتقان كوك جاۋىنىنداي
ءموپ-ءمولدىر تامشى كوردىڭ.
جالعىزدىعىڭدى سول ەمەندەي
ەسىڭە الدىڭ. جاس كۇنىڭ ۇشتى زاۋلاپ.
كوزىڭدى كولەگەيلەي
ءبىر تامشى جاس ءتۇستى اۋناپ.
ەمەننەن كوردىڭ ءوز تاعدىرىڭدى،
توكتىڭ مونشاق جاڭبىرىڭدى.
جاز كوركىن اشۋ ءۇشىن
شالعىنعا بولەپ،
جان ءورتىن باسۋ ءۇشىن
جاڭبىر دا كەرەك،
بيىلعى جاز جاڭبىر بوپ ءوتتى.
ءدىرىل
دىرىلدەيدى تاۋلاردان
اتىلىپ تاس بۇلاقتار.
دىرىلدەيدى جاعادا
جايقالىپ جاس قۇراقتار.
دىرىلدەيدى شىراقتاي
الىستا اسپان جۇلدىزى.
دىرىلدەيدى سىناپتاي
تاڭ الدىندا سۋ ءجۇزى.
تۇرامىن مەن ءدىرىلىن
دۇنيەنىڭ باقىلاپ.
المايدى كوز شىرىمىن
قۇس ۇيقىلى جاپىراق.
سول دىرىلدەن جىر تۋىپ،
سول دىرىلدەن گۇل شىعىپ
دۇنيەگە بۇلقىنىپ
تاراعانداي تىرشىلىك.