ەسىلدەگى فونتانعا 1 ميلليارد تەڭگە ىسىراپ قىلعان مادەنيەت باسقارماسى ەكس-باستىعى ۇستالدى
استانا. KAZINFORM - قارجىلىق مونيتورينگ اگەنتتىگى استانا قالاسىنىڭ مادەنيەت باسقارماسىنىڭ بۇرىنعى باسشىسى مەن مەردىگەر ۇيىم وكىلدەرىنە قاتىستى اسا ءىرى كولەمدە بيۋدجەت قاراجاتىن جىمقىرۋ فاكتىسى بويىنشا سوتقا دەيىنگى تەرگەۋ امالدارىن جۇرگىزىپ جاتىر.
2016 -جىلى استانا كۇنى مەرەكەسىنە وراي سالىنعان «كۇن» (ەسىل وزەنىندەگى جارىق-يلليۋميناتسيالىق جانە وت شوۋى) سۋبۇرقاعىنىڭ قۇرىلىسى كەزىندە مەملەكەتتىك ساتىپ الۋ ءراسىمى جۇرگىزىلمەي تىكەلەي كەلىسىمشارت جاسالعان.
سۋبۇرقاق جوبالىق قۇجاتتاماسىز جانە مەملەكەتتىك ساراپتامادان وتپەي سالىنعان.
قۇرىلىس بارىسىندا تەحنيكالىق سيپاتتامالارعا سايكەس كەلمەيتىن ساپاسىز ماتەريالدار قولدانىلعان.
ناتيجەسىندە اتالعان نىسان 2017 -جىلدان باستاپ جۇمىس ىستەمەي، قازىرگى تاڭدا اپاتتى جاعدايدا تۇر.
ۇرلانعان قاراجاتتىڭ كولەمى 1 ميلليارد تەڭگەدەن اسىپ وتىر.
كۇدىكتى، استانا قالاسىنىڭ مادەنيەت باسقارماسىنىڭ بۇرىنعى باسشىسى ۇستالىپ، ۋاقىتشا ۇستاۋ يزولياتورىنا قامالدى. تەرگەۋ اياسىندا ونىڭ مۇلكىنە تىيىم سالىندى.
ونىڭ ىشىندە 3 كوممەرتسيالىق نىسان، 2 اۆتوتۇراق ورنى جانە استانا قالاسىنداعى پرەميۋم ساناتتاعى پاتەر بار.
اتالعان ءىس بويىنشا كۇدىكتىلەرگە تيەسىلى 572 ميلليون تەڭگەنىڭ مۇلكىنە شەكتەۋ قويىلدى.
ق ر ق پ ك 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريالانبايدى.