مۇسىلماندار سانى قاي ۋاقىتتا حريستيانداردان اسادى

استانا. قازاقپارات - 2035-جىلعا قاراي الەمدەگى مۇسىلماندار سانى حريستيانداردان اسىپ، يسلام ءدىنىن ۇستانۋشىلار سانى بويىنشا الەمدە ءبىرىنشى ورىنعا شىعۋى مۇمكىن. بۇل تۋرالى DW باسىلىمى حابارلايدى.

Фото: Солтан Жексенбеков/ Kazinform

باسىلىم مالىمەتىنشە، مۇنداي بولجامدى ۆاشينگتونداعى Pew Research Center كوممەرتسيالىق ەمەس تالداۋ ورتالىعىنىڭ ماماندارى 18-قاراشادا جاريالاعان.

AP اگەنتتىگىنىڭ جازۋىنشا، بۇل وزگەرىستىڭ نەگىزگى سەبەپتەرىنىڭ ءبىرى - مۇسىلمان وتباسىلارىندا باسقا ءىرى ءدىني توپتارمەن سالىستىرعاندا بالا سانىنىڭ كوپ بولۋى. Pew Research Center دەرەگىنشە، 2020-2025-جىلدارى ءبىر مۇسىلمان ايەلگە ورتا ەسەپپەن 3,1 بالادان، ال ءبىر حريستيان ايەلگە 2,5 بالادان كەلگەن.

وزگە ءدىني توپتاردا بۇل كورسەتكىش ورتا ەسەپپەن 1,6 بولعان. بۇل ۇرپاق الماسۋى كەزىندە حالىق سانىنىڭ ساقتالۋىنا قاجەتتى دەپ ەسەپتەلەتىن 2,1 دەڭگەيىنەن تومەن.

ورتالىقتىڭ باعالاۋىنشا، 2020-جىلى الەمدە 2,27 ميلليارد حريستيان جانە 2,02 ميلليارد مۇسىلمان بولعان. بولجام بويىنشا، 2035-جىلعا قاراي مۇسىلماندار سانى 2,57 ميللياردقا، ال حريستياندار سانى 2,52 ميللياردقا جەتەدى.

ەگەر قازىرگى ۇردىستەر ساقتالسا، 2070-جىلعا قاراي الەمدەگى مۇسىلماندار سانى 3,6 ميللياردتان اسادى، ال حريستياندار سانى 3 ميللياردقا جۋىقتايدى.

بولجام جاساۋ كەزىندە حالىقتىڭ جاس قۇرىلىمى، تۋۋ كورسەتكىشتەرى، سونداي-اق ءدىني سەنىمىن وزگەرتۋ جانە كوشى-قون ۇردىستەرى ەسكەرىلگەن.

Pew Research Center ماماندارى شامامەن 40 جىلدان كەيىن ا ق ش- تا حريستياندار حالىقتىڭ باسىم بولىگىن قۇراۋدان قالۋى مۇمكىن دەپ بولجايدى. قازىر ولاردىڭ ۇلەسى ەلدەگى ەرەسەك تۇرعىنداردىڭ 62 پايىزىن قۇرايدى. ال 2065-جىلعا قاراي بۇل كورسەتكىش 50 پايىزدان تومەن ءتۇسۋى ىقتيمال.