وزگەرىستىڭ سەبەبى نەدە جانە سۋ دەڭگەيى قاشان قالپىنا كەلەدى - وسى ماسەلەلەردى انىقتاعان ەدىك.
قالا تۇرعىندارى Threads الەۋمەتتىك جەلىسىندە وزەننىڭ تارتىلعانىن كورسەتەتىن سۋرەتتەر جاريالاپ، بۇل جاعدايدى تالقىلاي باستادى. اتاپ ايتقاندا، كەنەسارى كوشەسىنىڭ باسىنان بەيسەكوۆ كوشەسىنە قاراي سوزىلعان ۋچاسكەدە سۋ دەڭگەيىنىڭ ايتارلىقتاي تومەندەگەنى كوپشىلىكتىڭ نازارىن اۋداردى.
- وزەنىمىز سەرۋەندەۋگە كەتىپتى، ءبىراق قايتىپ ورالۋعا ۋادە بەرگەن سياقتى، - دەپ جازدى Threads قولدانۋشىسى.
سونداي-اق، architecture_astana اككاۋنتىندا وزەن اياق استىنان تارتىلعانى تۋرالى جازبا جاريالاندى.
- ەسىل وزەنىنىڭ سۋى كەنەتتەن تارتىلا باستادى. كەنەسارى كوشەسىنىڭ باسىنان بەيسەكوۆ كوشەسىنە دەيىنگى ۋچاسكە تايىزداپ كەتتى. ازىرگە بۇعان نە سەبەپ بولعانى بەلگىسىز، - دەلىنگەن جازبادا.
جازباعا قالدىرىلعان پىكىرلەردە دە تۇرعىندار سۋ دەڭگەيىنىڭ سۇمدىق تومەندەگەنىن جازدى.
- بالالار رەزەڭكە ەتىك كيىپ ءجۇر، - دەپ جازدى جەلى قولدانۋشىلارىنىڭ ءبىرى.
وزەن سۋىنىڭ تارتىلۋ سەبەبىن انىقتاۋ ءۇشىن استانا اكىمدىگىنە جۇگىندىك. ۆەدومستۆو مالىمەتىنشە، قۇرىلىس باسقارماسى ەسىل وزەنىندە رەتتەۋشى بوگەتتىڭ بەسىنشى كەزەگىن سالۋ بويىنشا جوسپارلى جۇمىستاردى اياقتاعان. جينالعان سۋ ەسكى ارنا ارقىلى بۇرىلعان.
- سۋ باسۋ جاعدايلارى تىركەلگەن جوق. جاعداي باقىلاۋدا، - دەپ حابارلادى اكىمدىك.
سۋ دەڭگەيى قاشان كوتەرىلەتىنى تۋرالى سۇراققا ۆەدومستۆو وكىلدەرى شامامەن ءتورت-بەس كۇن قاجەت بولاتىنىن ايتتى.
ايتا كەتەيىك، بۇعان دەيىن ەسىل وزەنىنىڭ بويىندا ءبىرىڭعاي قوعامدىق كەڭىستىكتەر سالىناتىنىن جازعانبىز.