ەسىل وزەنىنىڭ سۋى ءبىر تاۋلىكتە 5 مەترگە كوتەرىلدى
پەتروپاۆل. KAZINFORM - سولتۇستىك قازاقستان وبلىسىندا كۇننىڭ جىلىنۋىمەن قار قارقىندى ەرىپ، وزەندەردىڭ سۋى قاۋىپتى دەڭگەيگە دەيىن كۇرت كوتەرىلۋ قاۋپى بار.
«قازگيدرومەت» ر م ك س ق و فيليالىنىڭ مالىمەتىنشە، وتكەن تاۋلىكتە سەرگەيەۆ سۋ قويماسىنىڭ سۋ دەڭگەيى 75 سانتيمەترگە كوتەرىلىپ، بوگەن 7 عا تولدى. كەشەدەن بەرى سۋى ەرنەۋىنەن اسىپ، توگىلىپ جاتىر.
عابيت مۇسىرەپوۆ اتىنداعى اۋداننىڭ توقسان ءبي اۋىلىنىڭ ماڭىندا ەسىل وزەنىنىڭ سۋى ءبىر تاۋلىكتە 492 سانتيمەترگە كوتەرىلدى. مۇنداعى قاۋىپتى دەڭگەي - 1800 سانتيمەتر، قازىر 1202 سانتيمەترگە جەتتى. كرەشەنكا ەلدى مەكەنى ماڭىندا ورنالاسقان گيدرولوگيالىق بەكەتتە ماماندار سۋ دەڭگەيىنىڭ 194 سانتيمەترگە وزگەرگەنىن انىقتادى.
ەسىل اۋدانىنىڭ پوكروۆكا ەلدى مەكەنىنىڭ ماڭىندا 67 سانتيمەترگە، قىزىلجار اۋدانىنىڭ نوۆونيكولسكوە ەلدى مەكەنىنىڭ جانىندا ەسىل وزەنى 36 سانتيمەترگە كوتەرىلگەن.
شاعىن وزەندەردىڭ دە سۋ دەڭگەيى ءبىرشاما ارتقان: اقانبۇرلىق وزەنى ۆوزۆىشەنكا اۋىلىنىڭ ماڭىندا - 172 سانتيمەترگە، كوۆىلنوە ەلدى مەكەنىنىڭ ماڭىندا 132 سانتيمەترگە، رۋزايەۆكا ەلدى مەكەنىنىڭ ماڭىندا شارىق وزەنى 145 سانتيمەترگە، گۋساكوۆكا اۋىلىنىڭ ماڭىندا بابىقبۇرلىق وزەنىنىڭ سۋ دەڭگەيى 129 سانتيمەترگە كوتەرىلدى. دەسەك تە، قاۋىپتى دەڭگەيگە ءالى جەتە قويعان جوق.
ايتا كەتەيىك، بۇعان دەيىن س ق و- دا سەرگەيەۆ قويماسىنداعى سۋ تاسي باستاعانىن حابارلاعان ەدىك.
اۆتوراقەركە داۋرەنبەك قىزى