ەسىل قالاسىندا تاسقىننان زارداپ شەككەن 21 وتباسى باسپانالى بولدى
ەسىل. KAZINFORM - ەسىل قالاسىندا تاسقىننان زارداپ شەككەندەر باسپانالى بولدى. جاڭا ۇيلەردى سالۋعا 500 ميلليون تەڭگەدەن اسا قارجى جۇمسالعان.
سۋ تاسقىنى كەزىندە ءۇيى توپان سۋدىڭ استىندا قالعانداردىڭ ءبىرى ولگا كايليبەر 3 ايعا جۋىق كوگەرگەن قابىرعالاردى جاماۋمەن اۋرە بولعانىن ايتادى.
- سۋ باسقان ۋاقىتتا كۇيەۋىم ەكەۋىمىز ۇيدە ەدىك. 20-30 مينۋتتىڭ ىشىندە تاسقىننىڭ دەڭگەيى كوتەرىلىپ، تىزەگە جەتتى. اۋپىرىمدەپ، قاجەتىمىزدى جيناپ الدىق. قالعانى جارامسىز بولىپ قالدى. نەگىزى نەسيە الىپ، وسى ءۇيدى قايتا قالپىنا كەلتىرۋدى ويلاپ جۇرگەنبىز. ەندى نەسيە الۋدىڭ دا، باسقا ۇيگە كوشۋدىڭ دە قاجەتى جوق، - دەيدى ول.
ەسىل قالاسىندا تاسقىننان زارداپ شەككەن 21 وتباسى باسپانالى بولدى
جاسى جەتپىسكە تاياعان كەيۋانا مەملەكەت تاراپىنان باسپانالى بولعانىنا ريزاشىلىعىن جەتكىزدى.
- نە دەگەن ءزاۋلىم ءۇي. جاپ-جارىق. ماعان قاتتى ۇنادى. قوبالجىپ تۇرمىن. العىستان باسقا ايتارىم جوق. العاشىندا سەنبەدىك. كىلتتى قولىما الىپ باقىتتان باسىم اينالىپ تۇر. قۋانىشىمىزدا شەك جوق، - دەيدى ولگا.
قىزىل كىرپىشتەن تۇرعىزىلعان ۇيلەر دەمەۋشى ەسەبىنەن سالىنعان. ءوز كەزەگىندە مەردىگەر، باس دەمەۋشى سالامات احمەتوۆ بۇل جوباعا 525 ميلليون تەڭگە كەتكەنىن ايتتى.
سالتاناتتى ءىس-شارا كەزىندە اقمولا وبلىسىنىڭ اكىمى مارات احمەتجانوۆ سۋ تاسقىنى كەزىندە 188 زارداپ شەگۋشىگە كومەك كورسەتىلگەنىن اتاپ ءوتتى.
- ەسىلدە تاسقىن كەسىرىنەن دالادا قالعان 37 وتباسى بار. ونىڭ 19-ى اۋىلدا، 18- ءى قالادا تۇرادى. ون التى وتباسى مەملەكەت ەسەبىنەن دايىن پاتەر ساتىپ الۋدى ءجون كوردى. جالپى، 188 زارداپ شەگۋشىگە الەۋمەتتىك كومەك كەرسەتىلدى. وسىلايشا جۇرت قالىپتى ومىرگە قايتا كوشكەن. تەك قانا مەرزىمىن ەمەس، ساپاسىن دا قاداعالاپ وتىردىق. حالىق قونىستانعان سوڭ نارازىلىق بولماسىن دەپ بارىنە ەرەكشە كوڭىل بولدىك. قوعامدىق باقىلاۋ دا بولدى. مىسالى، ىشتەگى پەشتەردىڭ ورناتىلۋىنا، بولمەلەردىڭ جوسپارىنا تۇرعىندار ءوز پىكىرىن قوستى، - دەدى م. احمەتجانوۆ.
ءبىر ۇلگىدە سالىنعان ۇيلەردىڭ ءىشى كەڭ، 85 شارشى مەتر. جەر تەلىمى - ون سوتتىق. ال، وتباسى مۇشەلەرىنە بايلانىستى بولمەلەردىڭ ورنالاسۋى ءارتۇرلى. ماۋسىنىڭ 1-ىندە باستالعان قۇرىلىس 100 كۇندە اياقتالدى.
اۆتور
ابىلايحان جۇماشيەۆ