ۇسىك، جاڭبىر، نايزاعاي: 17-مامىردا اۋا رايى قانداي بولادى

استانا. KAZINFORM - قازگيدرومەت ماماندارى 17-مامىر، جۇماعا ارنالعان اۋا رايى بولجامىن ۇسىندى.

وڭتۇستىك تسيكلونى جانە سوعان بايلانىستى اتموسفەرالىق فرونتتار قازاقستان تەرريتورياسىنىڭ باسىم بولىگىنە اسەرىن ساقتايدى.

سالدارىنان نايزاعاي ويناپ، جاڭبىر جاۋادى.

اسىرەسە وڭتۇستىك- شىعىستا، وڭتۇستىك- باتىستا قاتتى جاڭبىر، بۇرشاق جانە داۋىل بولجانادى.

رەسپۋبليكا بويىنشا جەل كۇشەيەدى، تۇنگى جانە تاڭەرتەڭگى ساعاتتاردا ەلدىڭ سولتۇستىگىندە، شىعىسى مەن ورتالىعىندا تۇمان تۇسەدى.

تۇندە اقمولا، سولتۇستىك قازاقستان پاۆلودار وبلىستارىنىڭ سولتۇستىك- شىعىسىندا، پاۆلودار، اباي وبلىستارىنىڭ سولتۇستىگىندە، شىعىس قازاقستان وبلىسىنىڭ شىعىسىندا توپىراق بەتىندە 1 گرادۋس ۇسىك جۇرەدى.

قاراعاندى وبلىسىنىڭ وڭتۇستىگىندە، ۇلىتاۋ وبلىسىنىڭ ورتالىعىندا، اباي، قوستاناي وبلىستارىنىڭ وڭتۇستىگىندە، اتىراۋ وبلىسىنىڭ وڭتۇستىك- شىعىسىندا، شىعىس قازاقستان وبلىسىنىڭ وڭتۇستىك- شىعىسىندا، قىزىلوردا وبلىسىنىڭ سولتۇستىگىندە، شىعىسىندا، ورتالىعىندا، باتىس قازاقستان وبلىسىنىڭ وڭتۇستىك- باتىسىندا، جەتىسۋ وبلىسىنىڭ شىعىسىندا جوعارى ءورت قاۋپى بار.

تۇركىستان وبلىسىنىڭ ءشولدى اۋداندارىندا، اباي وبلىسىنىڭ ءۇرجار اۋدانىندا توتەنشە ءورت قاۋپى ساقتالادى.

اۆتور
جانات قاپالبايەۆا