پسيحولوگ: ويىنقۇمارلىق - ءار وتباسىنىڭ شاڭىراعىن شايقالتىپ تۇرعان ماسەلە

استانا. KAZINFORM — قازىرگى تاڭدا قازاقستاندا ويىنقۇمارلىق (لۋدومانيا) ۇلكەن دەرتكە اينالىپ، كوپتەگەن وتباسىنىڭ شاڭىراعىن شايقالتىپ جاتىر. بۇل تۋرالى پسيحولوگ داريعا نازاروۆا ايتتى.

داريعا نازاروۆانىڭ ايتۋىنشا، سوڭعى جىلدارى ويىنقۇمارلىققا شالدىققاندار سانى كۇرت وسكەن. 2023 -جىلى پسيحولوگقا 26 ادام كومەك سۇراپ جۇگىنسە، 2024 -جىلى بۇل كورسەتكىش 71 گە جەتكەن، ونىڭ 13- ءى - ايەلدەر.

ونىڭ سوزىنشە، ويىنقۇمار ادام العاشقى كەزەڭدە يلليۋزيامەن جۇرەدى.

- پروبلەما سودان كەيىن باستالادى. ۋاقىت وتە تۋىستارى مەن دوستارى ونىڭ ويىنعا تاۋەلدىلىگىن ءبىلىپ، وعان سەنبەيدى. سالدارىنان ويىنقۇمار قارىزعا باتىپ، ابىرويىن جوعالتىپ، قاۋقارسىزدىققا ۇشىرايدى. ەڭ قاۋىپتىسى - ادام ءوز ماسەلەسىن شەشە المايدى، ونىڭ جالعىز جولى «ءولىم» دەپ ويلايدى. دەر كەزىندە جاناشىر بىرەۋ تابىلىپ، ماماننىڭ كومەگىنە جۇگىنبەسە، مۇنداي جاعداي قايعىلى اياقتالادى، - دەيدى داريعا نازاروۆا.

پسيحولوگ اتاپ وتكەندەي، ويىنقۇمار ادامنىڭ قارىزىن اينالاسىنداعىلار تولەمەۋ كەرەك، ماسەلەسىن بىرەۋ شەشىپ وتىرسا، ول قينالمايدى، تاعى دا تولەپ بەرەدى دەپ ءوزىن الدايدى.

- قيىندىقتى تۇسىنبەسە، ول ادام ماسەلەسىن شەشۋگە قۇلشىنبايدى. ويىنقۇمارلىققا وزىنە نە كەرەك ەكەنىن تۇسىنبەي جۇرگەن ادام كىرىپ كەتەدى، - دەپ ءتۇسىندىردى مامان.

داريعا نازاروۆا ويىنقۇمارلىقتى قالاي جەڭۋگە بولاتىنىن ايتىپ بەردى:

اپتاسىنا ءبىر رەت بولسا ءدا وز ارەكەتتەرىڭىزگە باعا بەرىڭىز؛
قارجىلىق ساۋاتتىلىقتى ارتتىرىپ، ترەنينگتەر مەن سەمينارلارعا قاتىسىڭىز؛
جاقىندارمەن كوبىرەك ۋاقىت وتكىزىپ، تۋىستار مەن دوستارمەن قارىم-قاتىناستى نىعايتىڭىز؛
سپورت، مۋزىكا نەمەسە باسقا قىزىعۋشىلىقپەن اينالىسىڭىز؛
ويىنقۇمارلىقتى مويىنداپ، پسيحولوگ نەمەسە پسيحوتەراپيەۆت كومەگىنە جۇگىنىڭىز.
- بىرىككەن ۇلتتار ۇيىمىنىڭ دەرەگىنە سايكەس ويىنقۇمارلىق — ۇلكەن دەرت ەكەنىن ناقتىلادى. الايدا، ويىنقۇمارلار ادەتتە ءوز اۋرۋىن مويىنداعىسى كەلمەي، «ءوزىم توقتاتا الامىن» دەپ الدايدى. بۇل رەتتە تۋىستاردىڭ مىندەتى — ونىڭ اۋرۋ ەكەنىن ءتۇسىنىپ، مامانعا جەتكىزۋ. مامان رەتىندە ايتارىم ويىنقۇمارلىقتى ساناعا جەتكىزۋ ارقىلى جەڭۋگە بولادى. ءوزىمىز دە، اينالامىزداعى جاناشىرلارىمىز دا امان بولسىن، - دەپ تىلەگىن ءبىلدىردى نازاروۆا.