پسيحولوگ اقشا نەگە باقىت اكەلمەيتىنىن ءتۇسىندىردى
اقشا مەن ماتەريالدىق بايلىقتىڭ كوپ بولۋى ادامنىڭ الەۋمەتتىك ورتاسىنىڭ سانى مەن ساپاسىن ارتتىرادى دەگەن تۇسىنىك - كوگنيتيۆتىك بۇرمالاۋ. سەبەبى مول بايلىق ادامدا ونى ساقتاپ قالۋعا قاتىستى الاڭداۋشىلىقتى ارتتىرادى. بۇل تۋرالى پسيحولوگيا عىلىمدارىنىڭ دوكتورى، پروفەسسور ۆەرا نيكيشينا ريا نوۆوستي-گە بەرگەن سۇحباتىندا ايتتى.
«جالعىزدىقتى سەزىنۋ كوبىنەسە ادامنىڭ ساناسىنداعى ەلەستەرمەن بايلانىستى. سولاردىڭ ءبىرى - ماتەريالدىق جاعداي مەن الەۋمەتتىك ورتانىڭ سانى مەن ساپاسىنىڭ اراسىنداعى بايلانىس تۋرالى يلليۋزيا. ياعني، «باي بولسام، جانىمدا كوپ ادام بولادى، جالعىزدىقتى سەزىنبەيمىن» دەگەن قاتە ۇعىم»، - دەدى پسيحولوگ.
ول تابىسى جوعارى ادامداردا ءجيى كەزدەسەتىن ەرەكشەلىككە توقتالدى.
«ولار كەيدە قاستارىندا جۇرگەن دوستارى مەن تانىستارىنىڭ شىنايى نيەتىنە كۇماندانا باستايدى. «ولار مەنىمەن شىنايى ارالاسىپ ءجۇر مە، الدە بايلىعىم ءۇشىن بە؟» دەگەن وي مازالاپ، ادامدا سەنىمسىزدىك پايدا بولادى.
ۇلكەن قارجى - ونى جوعالتىپ الماۋ ءۇشىن قوسىمشا باقىلاۋ مەن كۇشتى تالاپ ەتەدى. «ونى بىرەۋ تارتىپ الماسىن، بۇزىلىپ نە قۇرىپ كەتپەسىن» دەپ الاڭداۋ ادامنىڭ ۋاقىتى مەن كوڭىل-كۇيىنە نە اسەر ەتەدى»، - دەپ ناقتىلادى نيكيشينا.
پسيحولوگتىڭ ايتۋىنشا، قارجىلىق مۇمكىندىكتەر ادامنىڭ ءومىرىن ءارتۇرلى ەتۋگە كومەكتەسەدى، الايدا كوپ جاعدايدا ادامدار بۇل تۋرالى بولىسكىسى كەلمەيدى.
«رەسۋرستار وزىمدە قالسىن، تەك ەشكىم پايدالانىپ كەتپەسە بولدى» دەگەن ساقتىق ستراتەگياسى ءجيى تاڭدالادى. ءبىراق ادامنىڭ ميى تابيعاتىنان الەۋمەتتىك بولىپ باعىتتالعان. ءبىز ءومىرىمىزدىڭ العاشقى كەزەڭىنەن باستاپ-اق ادامدارمەن ءوزارا بايلانىس ورناتۋعا ۇمتىلامىز. سوندىقتان الەۋمەتتىك قارىم-قاتىناستاعى كەز كەلگەن جەتىسپەۋشىلىك پەن بۇرمالاۋشىلىق ءبىزدىڭ ەموتسيونالدىق جاعدايىمىزعا اسەر ەتەدى، - دەيدى مامان.