دەپۋتات امانجول ءالتاي «قازپوشتانىڭ» باسىلىمداردى جەتكىزۋ شىعىنىن سۋبسيديالاۋ فۋنكتسياسىن مادەنيەت جانە اقپارات مينيسترلىگىنىڭ قۇزىرەتىنە بەرۋ تۋرالى ماسەلە كوتەردى.
سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە- ءمينيسترى اسحات ورازبەك بۇل ۇسىنىستى قولدايتىنىن ايتتى.
«بۇرىن ءبىزدىڭ مينيسترلىك مادەنيەت مينيسترلىگىمەن بىرىكتىرىلگەن بولاتىن. ءبىر مينيسترلىك بولعاندىقتان سۋبسيديانى بىردەن بەردىك. قازىر ەكى مينيسترلىك بولەك- بولەك شىقتىق. سوندىقتان وسى باسىلىمداردى تاراتۋ قىزمەتتەرىن نەگىزىندە مادەنيەت جانە اقپارات مينيسترلىگى وزىنە الۋ كەرەك. مەن سولاي ويلايمىن»، - دەدى ۆيتسە مينيستر.
ونىڭ سوزىنشە، سوڭعى ءبىر جىلدا گازەت-جۋرنال تاسىمالىنىڭ سۋبسيدياسى 3 ەسە قىسقارىپ قالعان.
«ءبىز جىل سايىن بيۋدجەتتەن 10 ميلليارد تەڭگەدەي قاراجات الاتىنبىز. ونى تۇگەل سۋبسيدياعا بەرەمىز. ءبىراق بيىل بىزگە 3 ميلليارد تەڭگە عانا بەرىلدى. ياعني، باسىلىمداردى جەتكىزۋ سۋبسيدياسىنىڭ كولەمى بىزگە بايلانىستى ەمەس»، - دەدى اسحات ورازبەك.