بۇگىن سەناتتىڭ جالپى وتىرىسىنان كەيىن تىلشىلەر: «قازاقستان نەلىكتەن 7 تەلەفون كودىن قالدىردى؟ رەسەيگە قارسى سانكسيالار اياسىندا ەلىمىزدەگى بۇل جۇيەگە قاتىستى پروبلەما بولۋى مۇمكىن بە؟»، - دەپ سۇرادى.
«سانكسيالار بويىنشا الاڭداۋدىڭ رەتى جوق. سانكسيالىق ماسەلەلەردىڭ جالپى كودقا قاتىسى بولمايدى. شىنىمەن دە دۇنيەجۇزىلىك نومىرلەۋدىڭ 7- ايماعىن بىرلەسىپ (رەسەيمەن بىرگە) پايدالانىپ جاتىرمىز. الايدا وسى جەتىلىك اياسىندا بىزدە قوسىمشا نومىرلەۋ بار جانە ول تەك قازاقستانعا تيەسىلى. بۇل تۇرعىدا «77 »، «76 » بار، سونداي-اق قوسىمشا «70 » بويىنشا كەلىسىمگە كەلەمىز. بۇل نومىرلەۋ تەك قازاقستانعا قاتىستى بولادى»، - دەدى ج. ماديەۆ.
ونىڭ ايتۋىنشا، بۇعان دەيىن تەلەفون كودىن اۋىستىرۋعا قاتىستى سالا ساراپشىلارمەن ءتيىستى تالقىلاۋ بولدى.
«ساراپشىلار قاۋىمى بۇل يدەيانىڭ ءتيىمسىز ەكەنىن اتاپ ءوتتى»، - دەدى مينيستر.
ەسكە سالساق، بيىل ماۋسىم ايىندا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قازاقستاننىڭ نەلىكتەن 997 كودىنا اۋىسپاعانىن ءتۇسىندىردى.
ايتا كەتەيىك، وسىدان ءۇش جىل بۇرىن سول كەزدەگى مينيستر باعدات مۋسين قازاقستاننىڭ 997 تەلەفون كودىنا وتكەلى جاتقانىن جەتكىزگەن ەدى.
ول ەلىمىزگە 997 ءنومىرىن ب ۇ ۇ بەرگەنىن جانە ول كودتىڭ قازاقستان ءۇشىن نەلىكتەن سۇرالعانىن ءتۇسىندىردى.
دەگەنمەن بىلتىر قاراشادا قازاقستان 997 كودىنان باس تارتتى.
سونىمەن قاتار قازاقستان 77 كودىن وزىنە الۋ ءۇشىن ءتيىستى ۆەدومستۆولارمەن كەلىسسوز دە جۇرگىزگەن بولاتىن.