سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ بۇرىنعى باسشىسى تاتۋبايەۆ ۇستالدى

استانا. KAZINFORM - باس پروكۋراتۋرا 3-شىلدە كۇنى ازاپتاۋ بويىنشا كۇدىككە ىلىنگەن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ بۇرىنعى باسشىسى ت. م. تاتۋبايەۆتى ۇستاعانىن حابارلادى.

- قازاقستان رەسپۋبليكاسى باس پروكۋراتۋراسى 2025-جىلعى 3-شىلدەدە قىلمىستىق كودەكستىڭ 146-بابى 2-بولىگىنىڭ 1)، 2) تارماقتارىندا كوزدەلگەن قىلمىستى (ازاپتاۋ) جاسادى دەگەن كۇدىكپەن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ بۇرىنعى باسشىسى ت. م. تاتۋبايەۆتى ۇستاعانىن حابارلايدى. قازىرگى ۋاقىتتا سوتقا دەيىنگى تەرگەپ-تەكسەرۋ جالعاسۋدا، قوسىمشا دالەلدەمەلەردى جيناۋعا باعىتتالعان تەرگەۋ ارەكەتتەرى جۇرگىزىلىپ جاتىر، - دەلىنگەن حابارلامادا.

قىلمىستىق-پروتسەستىك كودەكستىڭ 201-بابىنا سايكەس سوتقا دەيىنگى تەرگەپ-تەكسەرۋدىڭ وزگە دەرەكتەرى جاريا ەتىلۋگە جاتپايدى.

بۇعان دەيىن حابارلانعانداي، ءماجىلىس دەپۋتاتى باس پروكۋراتۋرادان «س ق-فارماتسيا» باسشىلارىن تەرگەۋدى تالاپ ەتكەن بولاتىن.