نەسيە الاردا نەنى ەستە ساقتاۋ كەرەك؟
1. تەك اي سايىنعى تولەمگە نازار اۋدارۋ. كوپشىلىك نەسيە راسىمدەگەندە اي سايىن قانشا تولەيتىنىنە عانا ءمان بەرەدى. الايدا تولەمنىڭ از بولۋى نەسيەنىڭ ءتيىمدى ەكەنىن بىلدىرمەيدى. مەرزىمى ۇزارعان سايىن جالپى تولەنەتىن پايىز مولشەرى ارتۋى مۇمكىن.
سوندىقتان اي سايىنعى تولەممەن قاتار، نەسيەنىڭ تولىق قۇنىن جانە جالپى ارتىق تولەمدى ەسەپتەۋ ماڭىزدى.
2. جىلدىق ءتيىمدى سىياقى مولشەرلەمەسىن ەسكەرمەۋ. بانكتەر ۇسىناتىن نومينالدى پايىزدىق مولشەرلەمە مەن جىلدىق ءتيىمدى سىياقى مولشەرلەمەسى (ج ت س م) بىردەي ەمەس.
ج ت س م نەسيە قۇنىن سالىستىرۋعا مۇمكىندىك بەرەدى. ول پايىزدىق تولەمدەرمەن قاتار، ەسەپتەۋ تارتىبىنە سايكەس نەسيەگە بايلانىستى مىندەتتى شىعىنداردى دا قامتيدى. سوندىقتان ءارتۇرلى بانكتىڭ ۇسىنىسىن سالىستىرعاندا ج ت س م كورسەتكىشىنە نازار اۋدارعان ءجون.
3. ءوزىنىڭ قارجىلىق مۇمكىندىگىن دۇرىس باعالاماۋ. نەسيە الۋشىلار كەيدە قازىرگى تابىسىنا سەنىپ، الداعى شىعىندارىن ەسكەرمەيدى. جۇمىستان ايىرىلۋ، دەنساۋلىققا بايلانىستى شىعىندار نەمەسە وتباسىلىق جاعدايدىڭ وزگەرۋى قارىزدى وتەۋدى قيىنداتۋى مۇمكىن.
نەسيە راسىمدەمەس بۇرىن اي سايىنعى تابىستى، مىندەتتى شىعىنداردى جانە بۇرىننان بار قارىزداردى ەسەپتەۋ قاجەت.
4. نەسيە شارتىن تولىق وقىماۋ. كەيبىر ازاماتتار كەلىسىمشارتقا قول قوياردا ونىڭ نەگىزگى تالاپتارىمەن عانا تانىسادى. سونىڭ سالدارىنان قوسىمشا قىزمەتتەر، ساقتاندىرۋ، تولەم مەرزىمدەرى جانە مىندەتتەمەلەر تۋرالى ماڭىزدى اقپارات نازاردان تىس قالادى.
اسىرەسە مەرزىمىنەن بۇرىن وتەۋ ءتارتىبىن، تولەم كەشىككەن جاعدايدا قولدانىلاتىن شارالاردى جانە قوسىمشا قىزمەتتەردىڭ شارتتارىن مۇقيات تەكسەرگەن دۇرىس.
5. ءبىر نەسيەنى جابۋ ءۇشىن ەكىنشىسىن الۋ. بۇرىنعى قارىزدى وتەۋ ماقساتىندا جاڭا نەسيە راسىمدەۋ قارجىلىق جۇكتەمەنى ارتتىرۋى مۇمكىن. اسىرەسە جاڭا نەسيەنىڭ پايىزدىق مولشەرلەمەسى جوعارى بولسا نەمەسە وتەۋ مەرزىمى ۇزارتىلسا، جالپى بەرەشەك كوبەيەدى.
قايتا قارجىلاندىرۋ كەي جاعدايدا ءتيىمدى بولۋى مۇمكىن. ءبىراق مۇنداي شەشىم قابىلداماس بۇرىن ەكى نەسيەنىڭ تولىق قۇنىن سالىستىرۋ قاجەت.
6. بىرنەشە بانكتىڭ ۇسىنىسىن سالىستىرماۋ. نەسيە الۋشىلار كوبىنە جالاقى تۇسەتىن نەمەسە بۇرىننان قىزمەتىن پايدالاناتىن بانككە جۇگىنەدى. الايدا باسقا قارجى ۇيىمدارى تيىمدىرەك شارتتار ۇسىنۋى مۇمكىن.
بانكتەردى سالىستىرعاندا پايىزدىق مولشەرلەمەنى عانا ەمەس، ج ت س م-دى، جالپى قايتارىلاتىن سومانى، وتەۋ مەرزىمىن جانە قوسىمشا شىعىنداردى دا ەسكەرۋ كەرەك.
7. قارجىلىق رەزەرۆسىز نەسيە الۋ. بارلىق تابىسىن كۇندەلىكتى شىعىندار مەن نەسيە تولەمىنە جۇمسايتىن ادامنىڭ كۇتپەگەن جاعدايعا دايىن بولۋى قيىن.
سوندىقتان نەسيە الار الدىندا توتەنشە جاعدايلارعا ارنالعان قاراجات جيناقتاۋ ماڭىزدى. قارجىلىق رەزەرۆ تابىس ۋاقىتشا ازايعان جاعدايدا مىندەتتەمەلەردى ورىنداۋعا كومەكتەسەدى.
نەسيە - قوسىمشا تابىس ەمەس، بەلگىلى ءبىر مەرزىمدە قايتارىلۋعا ءتيىس قارجىلىق مىندەتتەمە. سوندىقتان قارىز راسىمدەۋ تۋرالى شەشىم قابىلداعاندا ونىڭ قاجەتتىلىگىن، تولىق قۇنىن جانە وتباسىلىق بيۋدجەتكە تۇسەتىن سالماعىن باعالاۋ قاجەت. ەڭ باستىسى - بانكتىڭ قانشا اقشا بەرۋگە دايىن ەكەنىنە ەمەس، ءوزىڭىزدىڭ قانشا قارىزدى قيىندىقسىز قايتارا الاتىنىڭىزعا نازار اۋدارۋ.