بيىل توعىز مىڭعا جۋىق قانداس قازاقستان ازاماتتىعىن العان. ولار ەلىمىزدىڭ ءار وڭىرىنە قونىستانىپ جاتىر. سولاردىڭ 340-ى اباي وبلىسىن تاڭداپتى. قىتايدان كوشىپ كەلگەن اقجارقىن امانگەلدى دە سولاردىڭ قاتارىندا. قازىر ول سەمەي قالاسىنداعى ۋنيۆەرسيتەتتە ءبىلىم الىپ ءجۇر. سونىمەن قاتار قازاق ءالىپبيىن مەڭگەرىپ، جاڭا ورتاعا بەيىمدەلۋدە.
اقجارقىن امانگەلدى، قانداس:
- قازاق ءتىلىن جەتىك مەڭگەرىپ جاتىرمىن. جازۋدى ۇيرەنىپ جاتىرمىن. ءبىز شەتەل ازاماتى بولعاندىقتان، قازىر كوبىسى جازۋدى بىلمەيدى. وسى جاققا كەلگەنىمە ءبىر ايدان استى جانە وسى ورتالىقتان الفاۆيت بويىنشا ءبارىن باسىنان باستاپ ۇيرەتىپ جاتىر. ىقتيار حات تۋرالى كەڭەستەر الدىق.
ايماقتاردا تاريحي وتانىنا ورالعان قانداستاردىڭ جاڭا ورتاعا بەيىمدەلۋىنە كومەكتەسەتىن ارنايى كەڭەس بەرۋ ورتالىقتارى جۇمىس ىستەيدى. سونىڭ ءبىرى سەمەي قالاسىندا 2010 -جىلدان بەرى قىزمەت كورسەتىپ كەلەدى. ورتالىق ماماندارى قونىس اۋدارۋشىلارعا مەملەكەتتىك ءتىلدى مەڭگەرۋگە، زاڭ تالاپتارىن تۇسىنۋگە جانە جۇمىسقا ورنالاسۋعا جاردەمدەسەدى. بيىل 325 ادامعا قولداۋ كورسەتىلدى.
اينۇر ءتابىلتاي، «ورالمانداردى بەيىمدەۋ ورتالىعى» ق ب جەتەكشىسى:
- ءبىز ءۇشىن قاراپايىم ارەكەتتەر، ەلەكتروندى پوشتا دەگەننىڭ ءوزىن بىلمەگەندىكتەن، ول كىسىلەردە تىركەۋ بويىنشا ول ءبىر ۇلكەن ماسەلە دەپ تۇسىنەدى. كوپ جاعدايدا بەلگىسىزدىك، بىلمەۋ ۇلكەن كەدەرگى اكەلەدى. سونىڭ بارلىعىن اشىپ كورەدى.
قازاقستاندا بيىل قانداس مارتەبەسىن بەرۋدىڭ جاڭا ءتارتىبى ەنگىزىلدى. ەندى ول بەس جىلعا بەرىلەدى. سونىمەن قاتار ەلگە كوشىپ كەلگەن ازاماتتارعا باسپانا جالداۋ مەن كوممۋنالدىق قىزمەتتەردى تولەۋگە مەملەكەتتەن سۋبسيديا قاراستىرىلادى.
ەرسىن قۇدايبەرگەنوۆ، وبلىستىق جۇمىسپەن قامتۋدى ۇيلەستىرۋ جانە ءا ب باسقارماسى باسشىسىنىڭ ورىنباسارى - وبلىستا 137 ادام قانداس مارتەبەسىن الدى. مەملەكەت تاراپىنان بەرىلەتىن بارلىق قارجىلاي كومەك ۋاقىتىندا ۇسىنىلۋدا. وبلىسقا كوشىپ كەلگەن قانداستار اراسىنان 22 وتباسى تۇرعىن ءۇي سەرتيفيكاتى تابىستالىپ، تۇرعىن ءۇي ساتىپ الدى.
قونىس اۋدارۋشىلاردىڭ الدىندا جاڭا ورتاعا بەيىمدەلۋ جانە جۇمىسقا ورنالاسۋ مىندەتتەرى تۇر. ال ءوڭىر ءۇشىن ولاردىڭ ورالۋى ەڭبەك رەسۋرستارىنىڭ ارتۋىنا جانە ەكونوميكالىق دامۋعا جاڭا مۇمكىندىكتەر اشادى.
24.kz