سوتتالعاندار نەگە قايتالاپ قىلمىس جاسايدى - كوميتەت جاۋابى

استانا. KAZINFORM - ىشكى ىستەر مينيسترلىگى قىلمىستىق اتقارۋ جۇيەسى كوميتەتىنىڭ ماماندارى سوتتالعاندار اراسىندا قىلمىس الەمىنىڭ سۋبمادەنيەتىنە بوي ۇسىنعانداردىڭ ماسەلەسى وزەكتى ەكەنىن راستاپ وتىر.

«مۇنداي جاعدايدا ولار ۇسىنىلعان كومەكتى قابىلداۋدى بىلاي قويىپ، قىلمىستىق اتقارۋ جۇيەسىنىڭ قىزمەتىنە بەلسەندى تۇردە كەدەرگى كەلتىرىپ باعادى. ۇكىم مەن جازا ول ادامداردى وزگەرتە المايدى. كەسىلگەن مەرزىمدى وتەپ شىققان سوڭ قايتالاپ قىلمىسقا ۇرىنادى»، - دەلىنگەن Kazinform ساۋالىنا جولدانعان جاۋاپتا.

قىلمىستىق اتقارۋ جۇيەسىنىڭ ماماندارى سوتتالعانداردىڭ رەجيمگە بويۇسىنۋدان گورى قىلمىستىق سۋبمادەنيەتكە بەيىم بولۋىنا بىرنەشە فاكتور اسەر ەتەتىنىن ايتادى.

«ادەتتە، ونداي ادامدار 1-2 رەت ەمەس، بىرنەشە رەت سوتتالعان بولىپ شىعادى. ولاردى زاڭدى ساقتايتىن ءومىر جولىنا سالۋ ءىس جۇزىندە مۇمكىن ەمەس. جاتاتىن ورنى بار، قاجەت دەگەن دۇنيەنىڭ ءبارىن اباقتى قامتاماسىز ەتەدى. وسىنىڭ ءبارىن ەسكەرسەك، سوتتالعان ادام جازا مەرزىمى بىتكەننەن كەيىن ايلاپ قانا بوستاندىقتا ءجۇرىپ، قايتا ورالادى. وسىلايشا ءومىرىنىڭ كوبى تۇرمەدە وتەدى. مۇنىڭ ءبارى سوتتالعان ادامنىڭ ومىرگە ماسىلدىق تۇسىنىكپەن قاراۋىن تۋدىرادى»، - دەلىنگەن كوميتەت جاۋابىندا.