سوتتا شەرزات ءولىمىنىڭ نەگىزگى سەبەبى اتالدى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا 16 جاستاعى شەرزات پولاتتىڭ ولىمىنە بايلانىستى باستى سوت وتىرىسى ءوتىپ جاتىر.

مەملەكەتتىك ايىپتاۋشى سوت وتىرىسى بارىسىندا كامەلەتكە تولماعان شەرزات پولاتتىڭ ءولىمى 2024 -جىلدىڭ 4 -قازانىندا ساعات 01:30  دا تالعار ورتالىق اۋداندىق اۋرۋحاناسىنىڭ ستاتسيونارىندا راستالعانىن مالىمدەدى. سونداي-اق پروكۋرور جاس ءوسپىرىمنىڭ سول كۇنى بولعان جانجال بارىسىندا قانداي جاراقات العانىن جانە قانداي سەبەپتەن قايتىس بولعانىن اتادى.

- كامەلەتكە تولماعان پولاتتىڭ ءولىمى سول جاق وكپەنىڭ جوعارى بولىگىنە زاقىم كەلتىرە وتىرىپ، سول جاقتاعى كەۋدە قۋىسىنا ەنىپ، شانشىلىپ كەسىلگەن جاراقات ناتيجەسىندە اۋىر قان جوعالتۋدان بولدى. ءولىمى 2024 -جىلدىڭ 4 -قازانىندا ساعات 01:30 دا تالعار ورتالىق اۋداندىق اۋرۋحاناسى ستاتسيونارىندا راستالعان. ءمايىتتى زەرتتەۋ كەزىندە كەلەسى دەنە جاراقاتتارى انىقتالدى: ىشكى جانە سىرتقى قان كەتۋدى تۋدىرعان سول جاق وكپەنىڭ جوعارى بولىگىنىڭ زاقىمدانۋى. بۇل دەنە جاراقاتى ستاتسيونارعا كەلگەنگە دەيىن شانشۋ- كەسۋ قاسيەتى بار زاتتىڭ اسەرىنەن تۋىنداعان. سىرتقى دەنە جاراقاتتارى: سول جاق جەلكە ايماعىندا باستىڭ شاشتى بولىگىنىڭ تەرىسىنىڭ كوگەرۋى، وڭ كوزدىڭ ىشكى بۇرىشىندا، وڭ كوزدىڭ قاباعىندا، وڭ قولدىڭ ارتقى بەتىندە، وڭ قولدىڭ ەكىنشى، ءۇشىنشى، ءتورتىنشى ساۋساقتارى، سول جاقتا مۇرىن، ەرىن ايماقتارىندا، وڭ بىلەكتىڭ ءبىر بولىگىندە سىزاتتار، - دەدى پروكۋرور.

بۇعان دەيىن نۇرقانات عايىپبايەۆتىڭ جانجال بارىسىندا قانداي جاراقات العانى ايتىلدى.

ەسكە سالايىق، شەرزات ىسىنە قاتىستى سوتتالۋشىلارعا بىرنەشە باپ بويىنشا ايىپ تاعىلدى.

پروكۋرور وقيعانىڭ تولىق حرونولوگياسىن باياندادى.

بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.