سوت قايرات نۇرتاستىڭ اپەللياتسيالىق شاعىمىن قاناعاتتاندىرمادى

استانا. قازاقپارات - 15 كۇنگە قامالعان ءانشى قايرات نۇرتاس (ايداربەكوۆ - رەد.) اپەللياتسيالىق شاعىم ءتۇسىردى. الايدا سوت اپەللياتسيالىق شاعىمدى قاناعاتتاندىرمادى.

بۇعان دەيىن اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوت قاۋلىسىمەن تانىمال ءانشى ۇساق بۇزاقىلىق جاساعانى ءۇشىن 15 تاۋلىك مەرزىمگە اكىمشىلىك قاماۋعا الىنعان بولاتىن.

بۇگىن استانا قالالىق سوتىندا قايرات ايداربەكوۆكە قاتىستى اكىمشىلىك قۇقىق بۇزۋشىلىق تۋرالى ءىس اپەللياتسيالىق تارتىپپەن قارالدى.

ءبىرىنشى ساتىداعى سوت قايرات ايداربەكوۆتىڭ ۇشاق ىشىندە جانجالداسۋ كەزىندە ازامات اسىلبەك بەكقايىروۆقا قول جۇمساپ، ونىڭ دەنساۋلىعىنا جەڭىل زيان كەلتىرىپ، توبەلەس كەزىندە بالاعات سوزدەر ايتقانىن انىقتادى.

«قۇقىق بۇزۋشىنىڭ ادۆوكاتى قاۋلىمەن كەلىسپەي، 434-باپتىڭ 2-بولىگى بويىنشا شاعىمدانىپ، قۇرامنىڭ بولماۋىنا بايلانىستى سوتتان ءىس جۇرگىزۋدى توقتاتۋدى سۇرادى. قاۋلىنىڭ كۇشىن جويۋ ءۇشىن نەگىز انىقتالماعاندىقتان اپەللياتسيانىڭ 2024-جىلعى 9-شىلدەدەگى قاۋلىسىمەن ءبىرىنشى ساتىداعى سوتتىڭ سوت اكتىسى وزگەرىسسىز قالدىرىلدى. قاۋلى زاڭدى كۇشىنە ەندى»، - دەپ حابارلادى ق ر جوعارعى سوتىنىڭ باسپا ءسوز قىزمەتى.

ەسكە سالا كەتسەك، «الماتى-استانا» باعىتىنداعى اۋە رەيسىندە ۇساق بۇزاقىلىق جانە دەنساۋلىققا قاساقانا جەڭىل زيان كەلتىرۋ فاكتىسى بويىنشا اكىمشىلىك ءىس قوزعالعان ەدى.

استانا قالاسىنىڭ اكىمشىلىك ىستەر بويىنشا مامانداندىرىلعان سوتى قايرات نۇرتاستىڭ بۇزاقىلىق ءىسى بويىنشا قاۋلى شىعاردى.

بۇعان دەيىن سوت وتىرىسىنىڭ قالاي وتكەنى باياندالعان بولاتىن.