سوت شەشىمىمەن حاسان قاسىمبايەۆ 2 ايعا قاماۋعا الىندى

الماتى. KAZINFORM - ادام دەنساۋلىعىنا قاساقانا اۋىر زيان كەلتىردى دەگەن كۇدىكپەن ۇستالعان حاسان قاسىمبايەۆ سوت شەشىمىمەن 2 ايعا قاماۋعا الىندى.

بۇل اقپاراتتى الماتى وبلىسىنىڭ پوليتسيا دەپارتامەنتى تاراتتى.

- جەدەل- تەرگەۋ ءىس- شارالارىنىڭ ناتيجەسىندە 2024 -جىلدىڭ 2-قاراشاسىندا ق. ەسىمدى ازامات ۇستالىپ، سوت شەشىمىمەن 2 ايعا قاماۋعا الۋ تۋرالى بۇلتارتپاۋ شاراسى قابىلداندى، - دەپ حابارلادى وبلىستىق پوليتسيا دەپارتامەنتىنىڭ باسپا ءسوز قىزمەتى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار ءجاسوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى ءجاسوسپىرىمنىڭ ولىمىنە قاتىستى ءىستى جەكە باقىلاۋىنا الدى.

سونداي- اق، قۇقىق قورعاۋشى ايتبەك امانگەلدى قازا تاپقان جاس ءوسپىرىمنىڭ وتباسىنا ادۆوكاتتار تاۋىپ بەردى.

الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ بەينەباقىلاۋ كامەرالارىنان الىنعان جازبالار زەرتتەلىپ جاتقانىن جەتكىزدى.

12 قازان تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

سونداي- اق باس پروكۋراتۋرا قىلمىستى اشۋ ءۇشىن ۆەدومستۆوارالىق جەدەل- تەرگەۋ توبى قۇرىلعانىن مالىمدەدى.

وسىعان دەيىن اتىشۋلى حاسان قاسىمبايەۆتىڭ ۇستالعانى تۋرالى جازدىق.