سوت ءتورت ەلدىڭ ازاماتى پاۆەل دۋروۆتىڭ قاماۋداعى مەرزىمىن ۇزارتتى

استانا. KAZINFORM - فرانسيانىڭ سوت ورگاندارى Telegram نەگىزىن قالاۋشى پاۆەل دۋروۆتى قاماۋدا ۇستاۋ مەرزىمىن ۇزارتتى، دەپ جازادى ت ا س س.

France-Presse اگەنتتىگىنىڭ حابارلاۋىنشا، جاۋاپ الۋ ءۇشىن قاماۋدا ۇستاۋدىڭ باستاپقى مەرزىمى 96 ساعاتقا دەيىن سوزىلۋى مۇمكىن.

LCI تەلەارناسىنىڭ حابارلاۋىنشا، Telegram نەگىزىن قالاۋشى پاۆەل دۋروۆ ءبىر كۇن بۇرىن پاريجدىڭ لە-بۋرجە اۋەجايىندا ۇستالعان. كاسىپكەر ازەربايجاننان كەلگەن. ونىڭ قاسىندا ءبىر قىز بەن كۇزەتشىسى بولعان.

فرانسۋزدىق TF1 تەلەارناسى ەلدىڭ قۇقىق قورعاۋ ورگاندارى دۋروۆتى «ەسىرتكى ساۋداسىنا، بالالارعا قارسى قىلمىستارعا جانە الاياقتىققا» قاتىسى بار دەگەن كۇدىكپەن قاماۋعا العانىن حابارلادى. قاماۋعا الۋ وردەرىن فرانسيانىڭ ۇلتتىق سوت پوليتسياسى دەپارتامەنتى الدىن الا تەرگەۋ نەگىزىندە شىعارعان. ول 20 جىلعا باس بوستاندىعىنان ايىرىلۋى مۇمكىن. قازىر دۋروۆ قاماۋعا الىندى، كەيىن سوتقا جەتكىزىلەدى.

دۋروۆ ءتورت ەلدىڭ - رەسەيدىڭ، كاريب تەڭىزى ارالدارىندا ورنالاسقان سەنت- كيتس جانە نيەۆيس شتاتىنىڭ، فرانسيا مەن ب ا ءا- ءنىڭ ازاماتى ەكەنى بەلگىلى. رەسەي سىرتقى ىستەر مينيسترلىگى فرانسياداعى رەسەي ەلشىلىگى دۋروۆ توڭىرەگىندەگى جاعدايدى ءتۇسىندىرۋ ءۇشىن قاجەتتى شارالاردى قابىلداعانىن حابارلادى.

يلون ماسك دۋروۆتىڭ فرانسيادا ۇستالۋىن ءسوز بوستاندىعىنا كەپىلدىك بەرەتىن ا ق ش كونستيتۋتسياسىنا ەنگىزىلگەن ءبىرىنشى تۇزەتۋدىڭ «تارتىمدى جارناماسى» دەپ اتادى. بولعان وقيعاعا تۇسىنىك بەرە وتىرىپ، ول 2030 -جىلعا قاراي ەۋروپادا جاي مەمدەرگە لايك باسقاندارعا دا ءولىم جازاسى تاعايىندالۋى مۇمكىن ەكەنىن ايتتى.

ءبىرقاتار ساياساتكەرلەر دە پاۆەل دۋروۆتىڭ قاماۋعا الىنۋىنا قاتىستى پىكىر ءبىلدىردى.

ا ق ش كونگرەسى وكىلدەر پالاتاسىنىڭ مۇشەسى ماردجوري تەيلور-گرين دۋروۆتىڭ قاماۋعا الىنۋىنا تۇسىنىك بەرە وتىرىپ، بۇكىل الەمدە ءسوز بوستاندىعىنا شابۋىل جاسالىپ جاتقانىن ايتتى.

اۋستريانىڭ بۇرىنعى سىرتقى ىستەر ءمينيسترى كارين كنايسل كاسىپكەردىڭ ۇستالۋىن اقىلعا قونىمسىز دەپ سانايدى.

فرانسيانىڭ بۇرىنعى ەۋروپارلامەنت دەپۋتاتى ەمەريك شوپراد دۋروۆتىڭ ۇستالۋىنا پاريجدىڭ Telegram-دى باقىلاۋعا دەگەن ۇمتىلىسى سەبەپ بولعانىن ايتتى.

Telegram مەسسەنجەرىنىڭ رەسمي اككاۋنتى كومپانيانىڭ نەگىزىن قالاۋشى پاۆەل دۋروۆتىڭ فرانسيادا ۇستالۋىنا قاتىستى العاش رەت تۇسىنىكتەمە بەرگەن ەدى.

اۆتور

ەركەجان سماعۇلوۆا