سوت الماتىنىڭ بۇرىنعى باسقارما باسشىلارىن ءۇي قاماققا جىبەرۋدەن باس تارتتى

الماتى. KAZINFORM - الماتى قالالىق جوسپارلاۋ جانە ۋربانيستيكا باسقارماسىنىڭ بۇرىنعى باسشىسى الماسحان احمەتجانوۆ پەن جەر قاتىناستارى باسقارماسىنىڭ بۇرىنعى باستىعى ارداق سامامبەتوۆتىڭ ادۆوكاتتارى سۋديادان قورعاۋىنداعى ازاماتتاردى ءۇي قاماققا جىبەرۋىن سۇرادى.

سوت وتىرىسى بارىسىندا ارداق سامامبەتوۆتىڭ قورعاۋشىسى ايىپتالۋشىعا قاتىستى بۇلتارتپاۋ شاراسىن وزگەرتۋ تۋرالى ءوتىنىش جاسادى.

سونداي-اق الماسحان احمەتجانوۆتىڭ ادۆوكاتى قورعاۋىنداعى ازاماتتى قاماۋعا الۋ تۇرىندەگى بۇلتارتپاۋ شاراسىن تاڭداۋ پروتسەسىندە ونىڭ دەنساۋلىعى ەسكەرىلمەگەنىن ايتىپ، ءۇي قاماققا اۋىستىرۋىن سۇرادى.

«قاماۋعا الۋ تۋرالى بۇلتارتپاۋ شاراسىن تەرگەۋ سوتى بەكىتكەن بولاتىن. قازىرگى تاڭدا ونى وزگەرتۋگە نەگىز جوق»، - جوق دەدى سۋديا.

ەسكە سالايىق، 2023-جىلدىڭ -19 شىلدەسىندە سىبايلاس جەمقورلىققا قارسى ءىس-قيمىل قىزمەتى زاڭسىز قۇرىلىسقا رۇقسات بەرىپ كەلگەن ۋربانيستيكا باسقارماسىنىڭ باسشىسى ۇستالعانى تۋرالى اقپارات تاراتقان ەدى.

ول جەر ۋچاسكەلەرىن بەرۋ جانە وبەكتىلەردىڭ قۇرىلىسىن كەلىسۋ كەزىندە لاۋازىمدىق وكىلەتتىكتەرىن اسىرا پايدالاندى دەگەن كۇدىككە ءىلىندى. ماسەلەن، جەكە تۇرعىن ءۇي قۇرىلىسىنا ارنالعان جەر ۋچاسكەلەرىندە، نىسانالى ماقساتىنا قاراماستان جانە قۇرىلىستىڭ تىعىزدىعىن ەسكەرمەي، جەكەلەگەن قۇرىلىس كومپانيالارىنىڭ مۇددەسى ءۇشىن 2020-2023 -جىلدارى 3 كوپ پاتەرلى تۇرعىن ءۇي كەشەنىنىڭ قۇرىلىسىن زاڭسىز كەلىسكەن. مەملەكەتكە 307 ميلليون تەڭگەدەن استام سوماعا جەر ۋچاسكەلەرىنىڭ تولەنبەگەن كاداسترلىق قۇنى تۇرىندە زالال كەلدى.

كەيىن مامانداندىرىلعان اۋدانارالىق تەرگەۋ سوتى الماسحان احمەدجانوۆتى قاماۋعا الدى.

سونداي-اق الماتى ۋربانيستيكا باسقارماسىنىڭ باسشىسىنا قانداي ايىپ تاعىلعانى ايتىلعان.

اۆتور

الما مۇقانوۆا