سپورتتىق گيمناستيكادان ەل قورجىنى تاعى ءبىر جولدامامەن تولىعۋى مۇمكىن

استانا. KAZINFORM - سپورتتىق گيمناستيكادان قازاقستاندىق سپورتشى ناريمان قۇربانوۆ ەل قورجىنىن پاريج وليمپياداسىنىڭ تاعى ءبىر جولداماسىمەن تولىقتىرۋى مۇمكىن.

ق ر سپورتتى دامىتۋ ديرەكسياسى ءمالىم ەتكەندەي، 2023-جىلى سپورتتىق گيمناستيكادان انتۆەرپەندە (بەلگيا) وتكەن الەم چەمپيوناتىندا ميلاد كاريمي تاريحي قولا جۇلدەگە قول جەتكىزىپ، پاريج وليمپياداسىنا بارۋعا مۇمكىندىك العان ەدى.

ال اتاعاش جاتتىعۋىنان جازعى ازيا ويىندارىنىڭ قولا جۇلدەگەرى ناريمان قۇربانوۆ تا ليتسەنزيا ۇتىپ الۋى مۇمكىن. وعان سەبەپ - وتانداسىمىز ليتسەنزيالىق كەزەڭدەردە وتە جاقسى ونەر كورسەتىپ، ءدال قازىر وليمپيادالىق رەيتينگتە 2-ورىندا تۇر.

الەم كۋبوگىنىڭ شەشۋشى كەزەڭى 17-20- ءساۋىر ارالىعىندا دوحادا (قاتار) وتەدى. وندا ءار جاتتىعۋدا توپ-3 رەيتينگكە كىرگەن سپورتشىلار پاريج وليمپياداسىنىڭ جولداماسىن جەڭىپ الادى.

ايتا كەتسەك، بۇعان دەيىن سپورتتىق گيمناستيكادان تەك 1996-جىلى اتلانتا وليمپياداسىندا عانا 3 بىردەي وتانداسىمىز ونەر كورسەتسە، قالعان ءتورتجىلدىق ويىنداردا 1 عانا گيمناسشى باق سىناپ كەلە جاتىر.

قازىرگى ۋاقىتتا ەل قورجىنىندا سپورتتىڭ 9 تۇرىنەن 23 سپورتشى 25 جولداماعا يە. اتاپ ايتار بولساق، ساداق اتۋدان – 4، تاس جولداعى ۆەلوسپورتتان – 3، نىسانا كوزدەۋدەن – 5، قازىرگى بەسسايىستان – 2، بوكستان – 7، گرەك-ريم كۇرەسىنەن – 1، ەركىن كۇرەستەن – 1، سپورتتىق گيمناستيكادان – 1، تاەكۆاندودان 1 جولداما بار.

اۆتوركۇنسۇلتان وتارباي