سپورتتى دامىتۋ ديرەكسياسىنىڭ ديرەكتورى الاياقتىق جاسادى دەگەن كۇدىككە ءىلىندى

استانا. KAZINFORM - باتىس قازاقستان وبلىسى بويىنشا سىبايلاس جەمقورلىققا قارسى قىزمەت سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكسياسى» ر م ق ك بۇرىنعى ديرەكتورىنا قاتىستى سوتقا دەيىنگى تەرگەۋ جۇرگىزىپ جاتىر.

سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنە سۇيەنسەك، تەرگەۋ دەرەكتەرى بويىنشا، كۇدىكتى 2021-2022-جىلدارى الداۋ ارقىلى جالپى سوماسى 57 ميلليون تەڭگە بيۋجەت قاراجاتىن جىمقىرعان. بۇل قاراجاتتى ب ق و دەنە شىنىقتىرۋ جانە سپورت باسقارماسى «Artsport» باعدارلاماسى بويىنشا جان باسىنا قارجىلاندىرۋ شارتى شەڭبەرىندە بالالاردى وقىتۋ بويىنشا كورسەتىلەتىن قىزمەتتەرگە «اقجايىق ف ك» ج ش س- نە بولگەن.

سوت سانكسياسىمەن ول قاماۋعا الىندى. قازىرگى ۋاقىتتا قالعان ادامداردىڭ قىلمىسقا قاتىسى تەكسەرىلىپ، جىمقىرۋدىڭ قوسىمشا ەپيزودتارىن انىقتاۋ جۇمىستارى جالعاسىپ جاتىر.

قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.