سپورتتاعى دەسترۋكتيۆتى ءدىني يدەولوگيامەن كۇرەس: ەل بيلىگى قۇجات ازىرلەدى
سپورت سالاسىنداعى دەسترۋكتيۆتى ءدىني يدەولوگيانىڭ تارالۋىنا جول بەرمەۋگە باعىتتالعان جول كارتاسىنىڭ جوباسى ازىرلەندى.
بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان، دەپ حابارلايدى Kazinform.
«قازىرگى تاڭدا ۋاكىلەتتى ورگان قۇقىق قورعاۋ جانە ارنايى ورگاندارمەن بىرلەسىپ، وسى سالادا (تەرىس اعىم جەتەگىندەگى ادامدارمەن جۇمىستى كۇشەيتۋ) جۇيەلى جۇمىستار جۇرگىزۋدە. بۇل رەتتە، دەسترۋكتيۆتى ءدىني يدەولوگيانىڭ حالىق اراسىندا تارالۋىنا جول بەرمەۋ جونىندەگى 2023-2024-جىلدارعا ارنالعان ءىس-شارالار جوسپارى ازىرلەنىپ، ىسكە اسىرىلۋدا. ىشكى ىستەر مينيسترلىگى، ۇلتتىق قاۋىپسىزدىك كوميتەتى، باس پروكۋراتۋرا جانە باسقا دا مەملەكەتتىك ورگاندارمەن 2023-2025-جىلدارعا ارنالعان سپورت سالاسىنداعى دەسترۋكتيۆتى ءدىني يدەولوگيانىڭ تارالۋىنا جول بەرمەۋگە باعىتتالعان جول كارتاسىنىڭ جوباسى ازىرلەندى»، - دەدى ۇكىمەت باسشىسىنىڭ ورىنباسارى جاۋابىندا.
ونىڭ اتاپ وتۋىنشە، ينتەرنەت جەلىسىندە اقپاراتتىق-پروفيلاكتيكالىق جانە قارسى ناسيحات جۇمىستارىن ۇيىمداستىرۋ ماقساتىندا ادىستەمەلىك ۇسىنىم ازىرلەنىپ، وڭىرلەرگە جىبەرىلدى.
«عىلىم جانە جوعارى ءبىلىم مينيسترلىگى جوعارى وقۋ ورىندارىندا تەولوگمامانداردى دايارلاۋدى جۇزەگە اسىرىپ كەلەدى. سونداي-اق «نۇر-مۋباراك» يسلام مادەنيەتى ۋنيۆەرسيتەتى جانىندا جىل سايىن تەولوگتاردىڭ بىلىكتىلىگىن ارتتىرۋ كۋرستارى ۇيىمداستىرىلۋدا. وسى تۇرعىدا كاسىبي مامانداردى دايارلاۋ، تەولوگتاردىڭ بىلىكتىلىگىن ارتتىرۋ، ولارعا قويىلاتىن تالاپتاردى بىرىزدەندىرۋ قولعا الىنادى. قازىرگى ۋاقىتتا ءدىن سالاسىنداعى ءبىلىم بەرۋ بويىنشا نەگىزگى قۇجات - 14 ماماندىقتان تۇراتىن «ءدىني قىزمەت سالاسىنداعى كاسىبي ستاندارت» ازىرلەنۋدە. جاڭا ستاندارت ءدىن سالاسىنداعى مامانداردىڭ بىلىكتىلىگىن ارتتىرادى جانە ۇزدىكسىز كاسىبي دامۋعا مۇمكىندىك بەرەدى. سونىمەن قاتار، ۇكىمەتتە ءدىن ماسەلەسى بويىنشا وڭىرلەردەگى تەولوگ ماماندار مەن قۇزىرلى ورگانداردىڭ قاتىسۋىمەن كەزدەسۋ ءوتتى. سولاردىڭ ۇسىنىستارى نەگىزىندە ازىرلەنگەن جول كارتاسىنىڭ جوباسى قوسىمشا پىسىقتالۋدا»، - دەدى تامارا دۇيسەنوۆا.