سپورتتاعى 2024 -جىلدىڭ باستى وقيعالارى قانداي

بيىل الەمدى جانكۇيەرلەر اسىعا كۇتەتىن بىرنەشە بەدەلدى جارىستار كۇتىپ تۇر. ولاردىڭ بارلىعىندا قازاقستاندىق سپورتشىلار باق سىنايدى. ولاردان مەدال الۋ مۇمكىندىگىمىز قانداي؟ Kazinform ءتىلشىسى اتالعان جارىستار جونىندە تارازىعا تارتىپ، قازاقستاندىق سپورتشىلاردىڭ دايىندىعىن زەردەلەپ كورگەن ەدى.

جاستارعا زور سەنىم ارتامىز

العاشقىسى 2024 -جىلدىڭ 19-قاڭتارىندا وڭتۇستىك كورەيانىڭ كانۆوندو قالاسىندا وتەتىن IV قىسقى جاسوسپىرىمدەر وليمپياداسى. ءدۇبىرلى دودا 1-اقپانعا دەيىن سوزىلادى.

وليمپياداعا جەر-جاھاننىڭ 70 ەلىنەن 1800 (950 ۇل، 950 قىز) سپورتشى قاتىسادى دەپ كۇتىلۋدە. سپورتتىڭ 7 تۇرىنەن 15 ديستسيپلينا بويىنشا 81 مەدال جيىنتىعى ساراپقا سالىنادى. جاسوسپىرىمدەر وليمپياداسى وسىمەن ءتورتىنشى رەت وتكەلى وتىر.

قازىرگى تاڭدا قازاقستان جاسوسپىرىمدەر قۇراماسىنىڭ قورجىنىندا بياتلون، كونكيمەن جۇگىرۋ، شورت-ترەك، كەرلينگ، شايبالى حوككەي، شاڭعى جارىسى، شاڭعىمەن ترامپليننەن سەكىرۋ، شاڭعى قوسسايىسى، تاۋ شاڭعىسى، فريستايل، پاراللەل موگۋل تۇرىنەن 30 جولداما بار.

قىسقى جاسوسپىرىمدەر وليمپياداسى 2012 -جىلدان باستاپ ءوتىپ كەلەدى. بۇعان دەيىن اۆستريا، نورۆەگيا جانە شۆەيتساريادا ءوتتى. كورەيا - وليمپيادانى قابىلداعان ءتورتىنشى ەل.

چەحيادا شەبەرلىگىمىزدى شىڭداي تۇسەمىز

شايبالى حوككەيدەن قازاقستان ۇلتتىق قۇراماسى 2024 -جىلدىڭ 10-26-مامىرى ارالىعىندا چەحيانىڭ پراگا جانە وستراۆا قالالارىندا ون التى قۇرامانىڭ قاتارىندا سىنعا تۇسەدى. ولار ا توبىندا (وستراۆا) ا ق ش، گەرمانيا، شۆەتسيا، سلوۆاكيا، لاتۆيا، فرانسيا، پولشامەن شەبەرلىك بايقاسادى.

بىلتىر ۇلتتىق قۇراما تىزگىنىن ۇستاعان قازاقستاندىق عالىم مامبەتاليەۆ سول قىزمەتىن بيىل دا جالعاستىرادى. بۇل شەشىم قازاقستان حوككەي فەدەراتسياسىنىڭ كونفەرەنتسياسى وتىرىسىندا قابىلداندى.

سونداي-اق، شايبالى حوككەيدەن 20 جاسقا دەيىنگىلەر اراسىنداعى ەل قۇراماسى بيىل ەليتالىق ديۆيزيوندا ويناۋعا مۇمكىندىك الدى. ولار ءبىرىنشى ديۆيزيوننىڭ ا توبىندا ءبىرىنشى ورىنعا تۇراقتاپ، ۇزدىكتەر قاتارىنا كوتەرىلدى.

ال وتكەن جىلدىڭ ساۋىرىندە ءبىزدىڭ جاسوسپىرىمدەر IA ديۆيزيونىنداعى الەم چەمپيوناتىندا ءبىرىنشى ورىندى يەلەنىپ، ەليتاعا كوتەرىلدى.

اتاپ وتەرلىگى، بيىل ۇلتتىق، جاستار جانە جاسوسپىرىمدەر قۇرامالارى الەم چەمپيوناتىنىڭ توپ- ديۆيزيونىندا ويىن كورسەتەدى. بۇل ەل تاريحىندا العاشقى مارتە كەزدەسىپ وتىر.

قۇرلىقتىق دودا قول بۇلعاپ تۇر

فۋتبولدان قازاقستان قۇراماسى 2024 -جىلعى ەۋروپا چەمپيوناتى فينالدىق ساتىسىنا شىعۋىنا ءالى دە مۇمكىندىگى بار. ەندى ۋەفا ۇلتتار ليگاسى پلەي-وفف ساتىسى ارقىلى قۇرلىقتىق دودا جولداماسىن قالتاعا باسۋعا بولادى.

ەل قۇراماسى ۇلتتار ليگاسىندا C جولىمەن 2024 -جىلدىڭ 21-ناۋرىزىندا جارتىلاي فينالدا سىرت الاڭدا گرەكيامەن كەزدەسەدى. جەڭگەن جاعدايدا 26-ناۋرىزدا تاعى دا سىرت الاڭدا گرۋزيا- ليۋكسەمبۋرگ جۇبىنىڭ جەڭىمپازىمەن شەبەرلىك بايقاسادى.

قازاقستاندىق فۋتبولشىلار ەۋروپا چەمپيوناتى ىرىكتەۋ ساتىسىندا بەسىنشى مارتە باق سىناپ وتىر. ءوز توبىندا 2008، 2012 -جىلداردا – 6، 2016، 2020 -جىلداردا – 5-ورىن الدى.

قازاقستاندىق فۋتبولشىلار H توبىندا دانيا، سلوۆەنيا، فينليانديا، سولتۇستىك يرلانديا جانە سان-مارينو قۇرامالارىمەن سىنعا ءتۇستى. العاشقىدا فۋتبول ساراپشىلارى ولاردى ءوز توبىندا سوڭعى ورىننىڭ ءبىرىن مىسە تۇتادى دەگەن بولجام جاساعان ەدى. دەسە دە ىرىكتەۋ ساتىسى بارىسىندا ەل قۇراماسى جوعارى دەڭگەيدە ويىن كورسەتە ءبىلدى. ءوز توبىندا ءۇشىنشى ورىنعا تۇراقتادى.

ەۋروپا چەمپيوناتىنىڭ فينالدىق ساتىسى 14-ماۋسىم مەن 14-شىلدە ارالىعىندا گەرمانيادا وتكىزىلەدى.

پاريجگە كىمدەر بارادى؟

بيىلعى جىلدىڭ باستى وقيعاسىنىڭ ءبىرى - پاريج وليمپياداسى 2024 -جىلدىڭ 26-شىلدەسى مەن 11-تامىزى ارالىعىندا وتەدى.

ءدۇبىرلى دودادا 32 سپورت تۇرىنەن جۇلدە ءوز يەسىن تابادى. الەمنىڭ 200 دەن اسا مەملەكەتىنەن كەلگەن سپورتشىلار 306 جۇلدە جيىنتىعىن ساراپقا سالادى. وعان باراتىن قازاقستاندىق سپورتشىلار سانى ءالى تولىق بەلگىلى بولعان جوق. الدا ىرىكتەۋ كەزەڭدەرى وتەدى. جارىسقا باراتىندار سانى سودان كەيىن بەلگىلى بولادى.

2024 -جىلعى وليمپيادا ويىندارىنىڭ باعدارلاماسىنا اكادەميالىق ەسۋ، بادمينتون، باسكەتبول (ونىڭ ىشىندە 3x3 باسكەتبول بار)، بوكس، كۇرەس، برەيكينگ، ۆەلوسپورت، سۋ سپورتى تۇرلەرى، ۆولەيبول، جاعاجاي ۆولەيبولى، گاندبول، گيمناستيكا (باتۋت، سپورتتىق گيمناستيكا، كوركەم گيمناستيكا)، گولف ەنگىزىلگەن. سونداي-اق، ونىڭ باعدارلاماسىندا بايداركا مەن كانوەدە ەسۋ، دزيۋدو، ات سپورتى، جەڭىل اتلەتيكا، ۇستەل تەننيسى، جەلكەندى سپورت، رەگبي-7، سەرفينگ، سكەيتبوردينگ، قازىرگى بەسسايىس، سپورتتىق قۇزعا ورمەلەۋ، ساداق اتۋ، سپورتتىق اتۋ، تەننيس، ترياتلون، تاەكۆوندو، اۋىر اتلەتيكا، فۋتبول، كوگالداعى حوككەي بار. وليمپيادانىڭ جاڭا باعدارلاماسىنا برەيكينگ، سپورتتىق قۇزعا ورمەلەۋ، سكەيتبوردينگ پەن سەرفينگ قوسىلدى.

جازعى وليمپيادا ويىندارىنا قازاقستاندىق سپورتشىلار تاۋەلسىز ەلىمىزدىڭ اتىنان 1994 -جىلدان بەرى قاتىسىپ كەلەدى. قازىرگە دەيىن بارلىعى 72 مەدال ەنشىلەپ ۇلگەردى. ونىڭ ىشىندە بوكس، اۋىر اتلەتيكا، جەڭىل اتلەتيكا، كۇرەس، ۆەلوسپورت، قازىرگى بەسسايىس، سۋعا ءجۇزۋ، دزيۋدو، وقۋ اتۋ، كاراتە، تاەكۆوندو بار.

ءتورتىنشى مارتە ۇزدىكتەر قاتارىندا

فۋتزالدان قازاقستان قۇراماسى 2024 -جىلعى الەم چەمپيوناتى فينالدىق ساتىسىندا وينايدى. جارىستىڭ ەليتالىق ساتىسىندا ەل قۇراماسى نيدەرلاند (2:0، 2:0)، ازەربايجان (4:2، 3:2) جانە رۋمىنيا (4:3، 2:0) قۇرامالارىن ەكى مارتەدەن جەڭىپ، 18 ۇپايمەن ا توبىندا ءبىرىنشى ورىن الدى.

ايتا كەتسەك، ەل قۇراماسى الەم چەمپيوناتىنىڭ فينالدىق ساتىسىندا 2000، 2016، 2021 -جىلداردا سىنعا ءتۇستى. ولار 2021 -جىلى 4-ورىنعا تابان تىرەدى.

الەم چەمپيوناتى 2024 -جىلدىڭ 14-قىركۇيەك جانە 6-قازان ارالىعىندا وزبەكستاندا وتكىزىلەدى. وندا بارلىعى 24 قۇراما باق سىنايدى. ەسكە سالساق، بۇدان بۇرىن «قازاقستان حوككەيى: ساتتىلىك سەرىك بولعان جىل» تاقىرىبىندا وي قوزعادىق.

سونداي-اق، ەل فۋتبولىنداعى ەلەۋلى وقيعالار تارازىعا تارتىلدى.

اۆتور

ءادىلجان ۇمبەت