سپورتشىلارىمىز ءبىر كۇندە وليمپياداعا توعىز جولداما جەڭىپ الدى

استانا. KAZINFORM - بۇگىن قازاقستان سپورتشىلارىنا اسپاننان وليمپيادا ويىندارىنىڭ جولدامالارى جاۋعان كۇن بولدى. ءبىر كۇندە اتلەتتەرىمىز توعىز جلداماعا قول جەتكىزدى.

بۇگىنگى پاريج وليمپياداسىنىڭ جولدامالارى ساراپقا سالىنعان الەمنىڭ ءار تۇكپىرىندە ءوتىپ جاتقان ليتسەنزيالىق تۋرنيردە وتانداستارىمىز ءساتتى ونەر كورسەتتى.

ەڭ الدىمەن جاپونيا استاناسى توكيو قالاسىندا كانوە مەن بايداركادا ەسكەك ەسۋدەن ازيا چەمپيوناتىندا پاريج وليمپياداسىنىڭ جولداملارىن ساراپقا سالعان سپورتشىلارىمىزدان ءسۇيىنشىلى جاڭالىقتار كەلدى. وندا وتانداستارىمىز بىردەن ءتورتجىلدىق باستى دوداعا 6 ليتسەنزيا جەڭىپ الىپ، جالپى جولدامالار سانىن 39 عا جەتكىزدى.

ايتا كەتسەك، كانوەدە 500 مەترگە ەسكەك ەسۋدە قازاقستان ايەلدەر قۇراماسى (ماريا بروۆكوۆا، رۋفينا يسكاكوۆا) چەمپيون اتانىپ، جازعى ويىندارعا جولداما ولجالادى.

500 مەترگە جارىستا قازاقستان ەرلەر قۇراماسى (بەكارىس راماتۋللا، سەرگەي توكارنيتسكي) مارەگە ءبىرىنشى جەتىپ، پاريجدەگى كەشەندى جارىستىڭ بيلەتىنە يەلىك ەتتى.

500 مەترگە جارىستا سەرگەي ەمەليانوۆ پەن تيمۋر حايداروۆ جۇبى وليمپيادا جولداماسىن جەڭىپ العان.

سپورتتىڭ بۇل تۇرىندە جۇپتىق سىندا ليتسەنزيا العان ەكى ەسكەكشى وليمپيادادا جەكەلەي سىندا ونەر كورسەتەدى.

ودان كەيىن قىرعىزستان استاناسى بىشكەك قالاسىندا كۇرەس تۇرلەرىنەن ءوتىپ جاتقان ليتسەنزيالىق تۋرنيردە قوس قازاقستاندىق بالۋان تاعى ەل قورجىنىنا ەكى جولدامانى سىيلادى. 97 كەلى سالماقتا الىشەر ەرعالي مەن 125 كەلى سالماقتا يۋسۋپ باتىرمۇرزايەۆ جانكۇيەرلەرىنىڭ ءۇمىتىن اقتادى.

وسىلايشا بالۋاندارىمىزدىڭ جەتىستىگىن جارىسا جازىپ جاتقاندا قاتار استاناسى دوحادان دا جاعىمدى جاڭالىق كەلىپ جەتتى. وندا سپورتتىق گيمناستيكادان ءوتىپ جاتقان الەم كۋبوگىنىڭ شەشۋشى كەزەڭىندە ات سناريادىنداعى جاتتىعۋى بويىنشا ناريمان قۇربانوۆ پاريج وليمپياداسىنا ليتسەنزيا جەڭىپ الدى.

مىنە، اپتانىڭ سوڭعى كۇنى وسىلاي قازاق سپورتشىلارى ءۇشىن ءساتتى اياقتادى. ءبىر كۇندە قازاق سپورتشىلارى 9 ليتسەنزياعا قول جەتكىزىپ، جالپى جولدامالار سانىن 42 گە جەتكىزدى.

ەندى، ەرتەڭ قىرعىزستان استاناسى بىشكەك قالاسىندا كۇرەس تۇرلەرىنەن ءوتىپ جاتقان ليتسەنزيالىق تۋرنيردە بۇرىمدى بالۋاندارىمىز پاريج وليمپياداسىنىڭ جولامالارىن ساراپقا سالادى.

اۆتور

كۇنسۇلتان وتارباي