سپورتشىلاردىڭ بويىنا ءداستۇرلى قۇندىلىقتاردى ءسىڭىرۋ وتە ماڭىزدى - توقايەۆ
استانا. KAZINFORM - پرەزيدەنت قاسىم-جومارت توقايەۆ پاريج وليمپياداسى جۇلدەگەرلەرىمەن كەزدەسۋدە سپورت رەزەرۆىن ازىرلەۋ ىسىندە بالالار مەن جاسوسپىرىمدەردىڭ سپورت مەكتەپتەرى نەگىزگى ءرول اتقاراتىنىنا نازار اۋدارىپ، ولاردىڭ جۇمىسىن جۇيەلەۋ جونىندە ماسەلە قوزعادى.
بۇل تۋرالى اقوردانىڭ باسپا ءسوز قىزمەتى حابارلادى.
- ەلىمىزدە 500-دەن استام بالالار مەن جاسوسپىرىمدەردىڭ سپورت مەكتەبى بار. ءبىراق ولاردىڭ قىزمەتىندە تۇيتكىلدى ماسەلەلەر از ەمەس. وسىنداي مەكتەپتەردىڭ باعدارلاماسىنا كىرگەن 162 سپورت ءتۇرىنىڭ تەك 52- ءسى عانا وليمپيادالىق سپورت تۇرىنە جاتادى. سوندىقتان وليمپيادالىق سپورت تۇرلەرىنىڭ رەزەرۆىن تولىقتىراتىن قابىلەتتى بالالار جەتىسپەيدى، سايىپ كەلگەندە سپورتتاعى جوعارى جەتىستىكتەردىڭ ناتيجەسى ناشارلايدى. قارجىنىڭ دۇرىس بولىنبەۋىنەن بيۋدجەت اقشاسىنىڭ باسىم بولىگى «جەلگە ۇشادى»، - دەدى پرەزيدەنت.
قاسىم-جومارت توقايەۆ وليمپيادا رەزەرۆىن دايىندايتىن مەكتەپ- ينتەرناتتار مەن كوللەدجدەرگە جان- جاقتى قولداۋ كورسەتۋ كەرەك ەكەنىن ايتتى.
- مۇنداي وقۋ ورىندارى بارلىق ايماقتا بولۋى قاجەت. الماتىدا جاڭا وليمپيادالىق دايارلىق بازاسى سالىندى. بۇل ءبىزدىڭ سپورتشىلارىمىزدىڭ جوعارى دەڭگەيدە جاتتىعۋىنا زور مۇمكىندىك بەرەدى. قازىر استانادا ۇلتتىق سپورت ۋنيۆەرسيتەتى سالىنىپ جاتىر. وقۋ ورنى سپورتتىق ءبىلىم بەرۋمەن شەكتەلمەيدى. وندا زاماناۋي زەرتتەۋ ورتالىعى اشىلادى. وسىنىڭ ءبارى ەلىمىزدە چەمپيونداردىڭ جاڭا بۋىنىن دايىنداپ شىعارۋعا جول اشاتىنىنا سەنىمدىمىن، - دەدى مەملەكەت باسشىسى.
پرەزيدەنت جاس سپورتشىلاردى ءتول تانىم-تۇسىنىگىمىزگە ساي تاربيەلەپ، ولاردىڭ بويىنا ءداستۇرلى قۇندىلىقتاردى ءسىڭىرۋ وتە ماڭىزدى دەپ سانايدى.
- ۇلتتىڭ جانى - تازا، ساناسى - ساۋ بولۋعا ءتيىس. سپورتشىلار، ەڭ الدىمەن، سپورتپەن شۇعىلدانۋى كەرەك. تاعى ءبىر مىندەت - سپورت قاۋىمداستىقتارىنىڭ تيىمدىلىگىن ارتتىرۋ. ولاردىڭ كوبى مىقتى سپورتشىلاردى ىرىكتەپ، كاسىبي تۇرعىدان ءوسىرۋدىڭ وڭتايلى جولىن تاپپاي كەلەدى. سونىڭ سالدارىنان ناعىز دارىندى جاستار كوزگە ىلىنبەي، جولى اشىلماي قالادى. سوندىقتان ەل ىشىندەگى ءتۇرلى جارىستاردا ادىلدىك بولۋىن قامتاماسىز ەتۋ كەرەك. سپورتشىلاردى ىرىكتەۋ جۇمىستارى بارىنشا اشىق جۇرگىزىلۋگە ءتيىس. سونىمەن قاتار سپورتشىلاردى دايارلاۋدىڭ ءبىرىڭعاي ستاندارتىن ازىرلەپ، زاماناۋي ادىستەمەلەر نەگىزىندە باپكەرلەر مەن تورەشىلەردىڭ بىلىكتىلىگىن ارتتىرۋعا باعىتتالعان شارالار قابىلداۋ قاجەت.
سپورتشىلاردى ساپالى مەديتسينالىق قىزمەتپەن قامتاماسىز ەتۋگە فەدەراتسيالار تاراپىنان جەتكىلىكتى كوڭىل بولىنبەي جاتقانىنا ءجيى شاعىم تۇسەدى. بۇكىل الەم سپورت مەديتسيناسى كاسىبي دايارلىقتىڭ اجىراماس بولىگى ەكەنىن مويىنداپ وتىر. بۇل - جوعارى تەحنولوگيالىق سالا. يننوۆاتسياسىز، وزىق عىلىمي ىزدەنىسسىز جانە جوعارى بىلىكتى ماماندارسىز ءىس ونبەيدى. مەملەكەت قاجەت رەسۋرستى ءبولىپ وتىر. دەمەۋشىلەردەن دە قىرۋار قارجى تۇسەدى. فەدەراتسيالار سونى ماقساتقا ساي جۇمساۋعا ءتيىس. رەسپۋبليكالىق فەدەراتسيالاردىڭ قىزمەتىنە ساراپتاما جۇرگىزىپ، قارجىلاندىرۋ تاسىلدەرىن قايتا قاراۋدى تاپسىرامىن، - دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، سوڭعى بەس جىلدا جوعارى جەتىستىكتەر سپورتىنا شىعىن ەكى ەسە وسكەن، ءبىراق سوعان لايىق ناتيجە جوق.
- سالالىق مينيسترلىك، ۇلتتىق وليمپيادا كوميتەتى، وڭىرلەردەگى سپورت باسقارمالارى مەن فەدەراتسيالاردىڭ جۇمىسىندا ولقىلىق كوپ ءارى ءوزارا ۇيلەسىمدى جۇمىس جوق دەپ سانايمىن. قازىرگى جاعدايعا قاراعاندا، سپورت فۋنكسيونەرلەرى سالانى دامىتۋمەن ەمەس، ميللياردتاعان بيۋدجەت قارجىسىن يگەرۋمەن الەك. ولار تۇپكى ناتيجەگە باس اۋىرتپايدى. سپورت سالاسىندا جەمقورلىق فاكتىلەرى ءجيى كەزدەسەدى. بۇل تەك وتاندىق سپورتتىڭ دامۋىنا عانا ەمەس، ەلدىڭ ابىروي-بەدەلىنە نۇقسان كەلتىرەدى. مۇندايعا جول بەرۋگە بولمايدى! - دەدى قاسىم-جومارت توقايەۆ.
بۇل رەتتە پرەزيدەنت بۇگىندە ءار ءوڭىر قانداي سپورتتى قولدايتىنى تۋرالى شەشىمدى ءوز بەتىنشە قابىلدايتىنىن سىنعا الدى. ۇكىمەتكە جاعدايدى باقىلاۋعا الىپ، سپورتقا قاتىستى مەكەمەلەردىڭ بارلىق دەڭگەيىندەگى باسقارۋ ۆەرتيكالىن قالپىنا كەلتىرۋ جونىندە تاپسىرما بەردى. سونىمەن قاتار ەلىمىزدىڭ سپورت قاۋىمداستىعى مەن شەتەلدەردە ۇلتتىق وليمپيادا كوميتەتىنىڭ بەدەلىن كوتەرۋ تۋرالى مىندەت جۇكتەدى. مەملەكەت باسشىسى ۇلتتىق سپورت تۇرلەرىن دامىتۋعا ەرەكشە ءمان بەرىلىپ جاتقانىنا نازار اۋدارىپ، ەلىمىزدە وتەتىن V دۇنيەجۇزىلىك كوشپەندىلەر ويىندارىنىڭ ءمان- ماڭىزىنا توقتالدى.
- بۇل سايىس ارقىلى ءبىز، ەڭ الدىمەن، ءتول وركەنيەتىمىزدىڭ تامىرى تەرەڭ تاريحىن جەر- جاھانعا پاش ەتەمىز. سونداي- اق ءدۇبىرلى دودا ءتۇرلى ەلدەردىڭ دوستىعىن نىعايتاتىن ماڭىزدى قادام بولماق. كوشپەندىلەر ويىندارى ەكولوگيانى ساقتاۋ، قازاقستاندى جاسىل ەلگە اينالدىرۋ جانە اباتتاندىرۋ تاقىرىبىن كوتەرۋگە جاقسى مۇمكىندىك بەرەدى. وليمپيادا كەزىندە ءتۇبى ءبىر تۇركى جۇرتى ءوزارا تىلەكتەستىك پەن جاناشىرلىقتىڭ شىنايى ۇلگىسىن كورسەتتى. سپورتشىلار دا، جانكۇيەرلەر دە كورشى ەلدەردىڭ ءاربىر جەڭىسىنە شىن جۇرەكتەن قۋاندى. ءبىر- بىرىنە قولداۋ ءبىلدىرىپ، قاجەت بولسا كومەكتەرىن دە اياعان جوق. ءتىپتى، بالۋاندارىمىز جەڭىس تۇعىرىنا تۋعان باۋىرلار سياقتى بىرگە كوتەرىلدى. حالىقتار اراسىنداعى رياسىز دوستىق دەگەنىمىز - وسى! بۇل - شىن مانىندە، باعا جەتپەس بايلىق. ءبىز بارلىق سالادا ءبىر-بىرىمىزگە تىلەكتەسپىز. كوشپەندىلەر ويىندارى باۋىرلاس ەلدەردىڭ وسىنداي مىزعىماس بىرلىگىن بەكەمدەي تۇسپەك. سوندىقتان ونى جوعارى دەڭگەيدە ۇيىمداستىرۋىمىز كەرەك، - دەدى پرەزيدەنت.
قاسىم- جومارت توقايەۆ ءسوزىن قورىتىندىلاي كەلە، ءبىز ءۇشىن بۇقارالىق سپورتقا جۇيەلى قولداۋ كورسەتۋ، جان-جاقتى دامىعان، سالاۋاتتى ۇلت قالىپتاستىرۋ ماڭىزدى ەكەنىن ەسكە سالدى.
- ءبىز وسى ماقساتتا دەنساۋلىق ساقتاۋ، الەۋمەتتىك سالا، ءبىلىم، عىلىم، مادەنيەت جانە سپورت سالالارىندا اۋقىمدى رەفورمالار جۇرگىزىپ جاتىرمىز. سوندىقتان قالايدا مەدال الۋ - ءبىزدىڭ جول ەمەس. بۇعان دەيىن جالعان اتاقتىڭ جەتەگىنە ەرىپ، ءتۇرلى قيتۇرقى ارەكەتتەر جاسالعانى بارىمىزگە ءمالىم. سونىڭ ناتيجەسىندە كوپتەگەن سپورتشى دەنساۋلىعىنان ايىرىلدى. ولار سپورتتان ءبىرجولاتا كەتتى. ەلىمىزدىڭ ابىروي-بەدەلىنە نۇقسان كەلدى. قازاقستانعا ءبىر ساتتىك، الدامشى جەتىستىكتەر كەرەك ەمەس. جۇرتتىڭ ءبىز تۋرالى نە ويلايتىنىنا الاڭداماي، ءتول بولمىس- ءبىتىمىمىزدى ساقتاۋىمىز كەرەك. جان- جاعىمىزعا جالتاقتاماي، العا قاراي باتىل ءارى جۇيەلى قادام باسۋىمىز قاجەت. كەز كەلگەن نارسەگە بولا سالىمىز سۋعا كەتىپ، كۇڭىرە بەرگەننەن، كۇيزەلىسكە تۇسكەننەن پايدا جوق. بۇل جونىندە مەن بۇعان دەيىن دە ايتقان ەدىم. ءبىزدىڭ ماقساتىمىز - بارشاعا ايقىن. بۇل - وزىق ەل بولۋ. سوندىقتان ءبىز ءبىر ەل، ءبىر حالىق بولىپ، تەك العا قاراي ءجۇرۋىمىز كەرەك. وليمپيادانىڭ ەڭ باستى قۇندىلىعى - مەدال عانا ەمەس. جاھاندىق باسەكە كەزىندە تۇتاس ەلىمىز ءوزارا تىلەكتەس، نيەتتەس بولدى. ەڭ باستى قۇندىلىق - وسى، - دەدى مەملەكەت باسشىسى.
سالتاناتتى جيىندا وليمپيادا چەمپيونى، دزيۋدوشى ەلدوس سمەتوۆ، بايراقتى باسەكەنىڭ قولا جۇلدەگەرلەرى، مەرگەن الەكساندرا لە مەن بوكسشى نازىم قىزايباي ءسوز سويلەپ، جىلى لەبىزدەرىن ءبىلدىردى.
اۆتور
ەلميرا ورالبايەۆا