سپورت ۇيىرمەلەرىنىڭ بيۋجەتىن ءبىرىڭعاي وقۋ-اعارتۋ مينيسترلىگىنىڭ قۇزىرىنا بەرگەن ءجون - اسحات ايماعامبەتوۆ
ءماجىلىستىڭ الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆ سپورت ۇيىرمەلەرىنىڭ بيۋجەتىن ءبىرىڭعاي وقۋ-اعارتۋ مينيسترلىگىنىڭ قۇزىرىنا بەرۋدى ۇسىندى، دەپ حابارلايدى Kazinform.
«ءبىزدىڭ ايتىپ وتىرعانىمىز - بىرىزدىلىك كەرەك. ويتكەنى ءاربىر مەملەكەتتىك ورگاننىڭ ءوز تاپسىرىسى بار. مىسالى، وقۋ-اعارتۋ مينيسترلىگىندە دە، ءدال وسىنداي (تۋريزم جانە سپورت مينيسترلىگىندەگىدەي - رەد.) ۇيىرمەلەر باعىتىنداعى سپورتتىق تاپسىرىس بار. سوندا بىزدە ستاتيستيكا بويىنشا دا، جالپى بىلاي دا قايتالانىپ جاتادى. ءار مينيسترلىك ءوزىنىڭ تاپسىرىسىن بەرمەي، بۇكىل قاراجاتتى ءبىر مينيسترلىككە بەكىتۋ كەرەك. ونىڭ ءبارى مەكتەپتە وقىپ جاتقان بالالار عوي. سول ۆاۋچەرلەردى، كۋپونداردى، مەملەكەتتىك تاپسىرىستى بىرىزدەندىرۋ ماسەلەسىن كوتەرىپ وتىرمىز»، - دەدى دەپۋتات.
ايتۋىنشا، اتالعان ۇسىنىس ۇكىمەتتەن پارلامەنتكە كەلىپ تۇسەتىن زاڭ جوباسىندا كورىنىس تابۋى مۇمكىن.
«ارينە، شەشىم قابىلدايتىن ۇكىمەت. سوندىقتان ۇكىمەت بۇل ماسەلەگە ءبىر نۇكتەسىن قويادى دەپ ويلايمىز. قازىر زاڭ جوباسى ۇكىمەتتەن بىزگە كەلە جاتىر. سول قۇجات كەلگەننەن كەيىن ىشىنە قانداي نورمالار ەنگىزگەنىن قارايمىز. سودان كەيىن بارىپ بۇل ماسەلەنى بىرگە تالقىلاپ، ناقتى شەشىم قابىلدايمىز. بۇل جەردە سپورت ۇيىرمەلەرىن عانا ايتىپ وتىرمىن. قالعان ۇيىرمەلەر قازىر وقۋ-اعارتۋ مينيسترلىگىنىڭ قۇزىرىندا. ال سپورتقا ەكى بىردەي مينيسترلىك قاراجات ءبولىپ وتىر. سوندىقتان قايتالاۋ بولىپ جاتىر»، - دەدى اسحات ايماعامبەتوۆ.