سپورت پەن ونەر: «بالقاديشا» انىمەن تانىلعان جاس دزيۋدوشى سۇحبات بەردى
استانا. KAZINFORM - جاقىندا «بالقاديشا» ءانىن قۇيقىلجىتا ورىنداعان جاس سپورتشىنىڭ بەينەجازباسى الەۋمەتتىك جەلىنى شارلاپ كەتكەن ەدى. ءبىر ساتتە جەلى قولدانۋشىلارىن داۋىسىمەن ءتانتى ەتكەن جاس جەتكىنشەك «بۇگىن LIVE» باعدارلاماسىنا ونلاين بايلانىسقا شىعىپ، ءوز اسەرىمەن ءبولىستى.
- ءبىز ميراس اعا ەكەۋمىز جاي كۇرەسىپ، باستەسكەن ەدىك. ول ماعان: «باستەن ۇتىلساڭ، ولەڭ ايتاسىڭ»، - دەدى. سولاي مەن ۇتىلىپ، «بالقاديشانى» ورىندادىم. ۆيدەو تارالىپ، تانىمال بولعانىن ەستىگەندە وتە كەرەمەت اسەردە بولدىم. شىنىمدى ايتسام، ءتىپتى 2-3 كۇن سەنە الماي ءجۇردىم، - دەيدى دزيۋدوشى.
يسا بەكبولات ءدال وسى بەينەجازبا جەلىدە كەڭ تاراعاننان سوڭ وزىنە ءتۇرلى ۇسىنىستاردىڭ ءتۇسىپ جاتقانىن ايتادى.
- جالپى مەنىڭ داۋىسىم - ءوزىمنىڭ تابيعاتىمنان بار. انام ءاندى كەرەمەت ايتادى. وسى قاسيەت انامنان دارىعان. مەن كوپتەگەن كونكۋرستاردا «بالقاديشا» ءانىن ورىنداعانمىن. بۇل ءان وزىمە قاتتى ۇنايدى. وسى ۆيدەو تاراعاننان كەيىن الماتىدان، ءتۇرلى قالالاردان كوپتەگەن ۇسىنىستار ءتۇسىپ جاتىر. ءبىراق مەن سپورتتى دا، انشىلىكتى دە قاتار الىپ جۇرگىم كەلەدى، - دەيدى وقۋشى.
جاس تالانتتىڭ اكەسى دە ونەر جولىنداعى ازامات ەكەن. دومبىرانىڭ قۇلاعىندا وينايتىن ءىلياس بەكبولات ۇلىنىڭ تالانتى تۋرالى ءوز پىكىرىن ءبىلدىردى.
- مەنىڭ ماماندىعىم - دومبىراشى. ءبىراق ءان ايتۋعا داۋىسىم مەن قابىلەتىم جوق. «ءاۋ دەمەيتىن قازاق جوق» دەمەكشى، اناسى دا كاسىبي ءانشى بولماسا دا، دومبىرا تارتادى. ال بالام ارنايى مۋزىكا مەكتەبىنە قاتىسپايدى. المالى ورتا مەكتەبىنىڭ ءان ساباعىنان بەرەتىن مۇعالىمى بىرنەشە كونكۋرسقا قاتىستىرىپ، وسىنداي دەڭگەيگە جەتكىزدى، - دەيدى ول.
ەسكە سالا كەتەيىك، قازاقستان ءانشىسى «ازەربايجان داۋىسى» شوۋىنىڭ جارتىلاي فينالىنا شىقتى.