سپورت كوممەنتاتورى گيننەس رەكوردتار كىتابىنا ەندى - شەتەلدەگى قازاق باسپا ءسوزى
استانا. KAZINFORM - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
جازدىڭ ورتاسىندا اۋەسقويلار شينجاڭعا شاڭعى تەبۋگە كەلدى - «حالىق گازەتى»
جاقىندا ءبىر بلوگەر شينجاڭداعى مۋستاگ(مۇزتاۋ) شىڭىندا شاڭعىمەن سىرعاناعان ۆيدەوسىن جاريالاپ، جەلى قولدانۋشىلارىنىڭ قىزىعۋشىلىعىن تۋدىردى، دەپ حابارلايدى قىتايدىڭ «حالىق گازەتى» .
اتالعان ب ا ق-تىڭ كەلتىرگەن دەرەگىنە سۇيەنسەك، شىلدە ايىندا شينجاڭدا شاڭعى تەبۋ تاڭسىق ەمەس. ءسىز مۇنى دۋ-كۋ (مايتاۋ- كۇشار) تاسجولىندا ءوز كوزىڭىزبەن كورە الاسىز. بۇل جولدا ء«بىر كۇندە ءتورت ماۋسىم، ون شاقىرىم سايىن ءتۇرلى اۋا رايى» بولادى. 6-شىلدەدە دۋ-كۋ تاسجولىنا قالىڭ قار جاۋىپ، جول كوكتايعاق بولىپ، كەپتەلىس پايدا بولدى. كولىك يەلەرى قارلى جولدا كولىكتەرىن يتەرۋگە ءماجبۇر بولعان.
«7-شىلدەدە دۋ-كۋ تاسجولىنىڭ تەڭىز دەڭگەيىنەن 3400 مەتر بولىگىندەگى قاشاىلگەن اسۋىندا اۋا تەمپەراتۋراسى 14 گرادۋس بولدى، تۋريستەر مۇندا جازعى شاڭعى تەبۋدى تاماشالادى»، دەپ جازدى «حالىق گازەتى».
سونىمەن قاتار وسى اپتادا «حالىق گازەتى» باسىلىمىندا «پاريج وليمپياداسىنا قاتىساتىن قىتايدىڭ سپورتتىق دەلەگاتسياسى قۇرىلدى» دەگەن تاقىرىپتاعى اقپارات جارىق كوردى.
قىتايلىق باسىلىمنىڭ كەلتىرگەن دەرەكتەرىنە سۇيەنسەك، 13 شىلدەدە بەيجىڭدە قىتايدىڭ پاريج وليمپياداسىنا قاتىساتىن سپورتتىق دەلەگاتسياسى قۇرىلدى. «قىتايلىق سپورت دەلەگاتسياسىنىڭ جالپى سانى 716 ادام، ونىڭ ىشىندە 405 سپورتشى. سپورتشىلار اراسىندا 42 وليمپيادا چەمپيونى بار، ال 223 ى وليمپيادا ستاديونىندا العاش رەت ونەر كورسەتەدى. وسى وليمپيادا ويىندارىنداعى قىتايلىق سپورت دەلەگاتسياسى 30 نەگىزگى، 42 قوسالقى جانە 236 كىشىگىرىم ءىس-شاراعا قاتىسادى»، دەپ جازدى People.cn.
سونداي-اق، «حالىق گازەتى» باسىلىمىندا «دومبىرا - قازاق حالقىنىڭ مادەني قازىناسى» دەگەن شاعىن بەينەروليگى بار اقپارات جاريالاندى.
«دومبىرا - قازاق حالقىنىڭ مادەنيەتىندە ماڭىزى زور ەكى ىشەكتى شەرتپەلى مۋزىكالىق اسپاپ. ول قىتايدىڭ شينجاڭ- ۇيعىر اۆتونوميالىق رەگيونىندا تانىمال جانە قازاقستان حالقىنىڭ ومىرىندە تەرەڭ مادەني ءرول اتقارادى. دومبىرانىڭ قوڭىر اۋەنىنە قۇلاق سالىڭىز!» دەپ جازدى قىتايلىق باسىلىم.
قازاقستان، رەسەي، يران جانە تۇركىمەنستان ورتاق كەلىسىمگە قول قويدى - Parstoday
قازاقستان، رەسەي، يران جانە تۇركىمەنستان سولتۇستىك-وڭتۇستىك ءدالىزىنىڭ شىعىس باعىتىن دامىتۋ بويىنشا جول كارتاسىنا قول قويدى، دەپ حابارلادى يراننىڭ «Parstoday» اقپارات اگەنتتىگى.
اتالعان باسىلىمنىڭ مالىمەتىنشە، بۇل قۇجات ءدالىزدىڭ وتكىزۋ قابىلەتىن 2027 -جىلعا قاراي جىلىنا 15 ميلليون تونناعا، 2030 -جىلعا قاراي 20 ميلليون تونناعا دەيىن ارتتىرۋعا مۇمكىندىك بەرەدى.
قول قويۋ اقتاۋدا ءوتىپ جاتقان «سولتۇستىك-وڭتۇستىك» ءبىرىنشى كولىكتىك ساۋدا- ەكسپورت فورۋمىندا وتكەن. وعان 12 ەلدىڭ، سونداي-اق ەۋرازيالىق ەكونوميكالىق كوميسسيا مەن ەكونوميكالىق ىنتىماقتاستىق ۇيىمىنىڭ وكىلدەرى قاتىسقان.
سپورت كوممەنتاتورى گيننەس رەكوردتار كىتابىنا ەندى - TRT
بوكس ماتچتارىنىڭ اڭىزعا اينالعان داۋسى، TRT سپورت كوممەنتاتورى ورحان ايحان گيننەس رەكوردتار كىتابىنا ەندى. ورحان ايحان 61 جىل 275 كۇن ەڭبەك ەتىپ، ەڭ ۇزاق كارەراعا يە ەركەك سپورت كوممەنتاتورى اتاعىن الدى، دەپ حابارلايدى تۇركيا راديو تەليەۆيزيا پورتالى.
تۇركيالىق ب ا ق-تىڭ دەرەگىنشە، 24 جاسىندا راديودا سپورت كوممەنتاتورى قىزمەتىن باستاعان ول كاسىبي ومىرىندە 6 وليمپيادا مەن كوپتەگەن چەمپيوناتقا قاتىستى. كوممەنتاتور اسىرەسە بوكس الەمىنە قىزىعۋشىلىق تانىتتى. الەمگە ايگىلى بوكسشىلار مەن كلۋبتاردىڭ جارىستارىن ۇسىنعان. سونىمەن بىرگە ول فۋتبولدىڭ اتى اڭىزعا اينالعان تۇلعاسى برازيليالىق پەلەنىڭ مەرەيتويىنا قاتىسقان جالعىز تۇرىك جۋرناليسى اتاعىنا يە.
«ورحان ايحان 61 جىلدان استام ەڭبەك جولى ءۇشىن گيننەستىڭ رەكوردتار كىتابىنا ەندى. ءالى كۇنگە دەيىن «TRT Spor» تەلەارناسىندا جۇمىس ىستەيدى. ول قازىرگە دەيىن 11 مىڭ 500 دەن استام ماتچتى ۇسىندى»، دەپ جازادى تۇركيالىق باسىلىم.
سونداي-اق وسى اپتادا «TRT» باسىلىمىندا «تۇرىك ۋنيۆەرسيتەتى قازاقستان ۋنيۆەرسيتەتتەرىمەن كەلىسىمگە كەلدى» دەگەن تاقىرىپتاعى اقپارات جارىق كوردى.
تۇركيالىق ب ا ق-تىڭ دەرەگىنشە، اتاتۇرىك ۋنيۆەرسيتەتى ەندى قازاقستاننىڭ كەيبىر ۋنيۆەرسيتەتتەرىمەن عىلىمي زەرتتەۋلەردە ىنتىماقتاسادى. اتالعان ۋنيۆەرسيتەت قازاقستاننىڭ كەيبىر ۋنيۆەرسيتەتتەرىمەن جانە تۇرىك ىنتىماقتاستىق جانە ۇيلەستىرۋ اگەنتتىگىمەن (ت ي ك ا) بىرلەسكەن عىلىمي زەرتتەۋلەر سياقتى ماسەلەلەردە ىنتىماقتاستىق جاسايدى، دەپ حابارلايدى تۇركيا راديو تەليەۆيزيا پورتالى.
تۇركيالىق ب ا ق-تىڭ كەلتىرگەن مالىمەتىنە سۇيەنسەك، ۋنيۆەرسيتەت تاراپىنان جاسالعان مالىمدەمەگە سايكەس رەكتور پروفەسسور، دوكتور ومەر چوماكلى «جاڭا بۋىن ۋنيۆەرسيتەت جوبالاۋ جانە ترانسفورماتسيالاۋ» جوباسى اياسىندا الەمدىك ۋنيۆەرسيتەتتەرمەن ىنتىماقتاستىق كەلىسىمدەرىن كەڭەيتۋ ماقساتىندا قازاقستاننىڭ كەيبىر ۋنيۆەرسيتەتتەرىن ارالاعان.
رەكتور چوماكلى ساپارى بارىسىندا قازاقستانداعى تۇركيا ەلشىلىگىمەن، تيكا كەڭسەسى، گۋميليەۆ ۋنيۆەرسيتەتى جانە اگروتەحنيكالىق ۋنيۆەرسيتەت باسشىلارىمەن دە كەزدەسكەن.
ت ي ك ا ساپارى بارىسىندا قازاقستانداعى تۇرىك مەكتەپتەرى مەن ۋنيۆەرسيتەتتەرى اراسىندا ءتۇرلى جوبالاردا ىنتىماقتاستىق ورناتۋ تۋرالى كەلىسىمگە قول جەتكىزىلدى. ستۋدەنت جانە وقىتۋشى الماسۋ باعدارلامالارى، بىرلەسكەن عىلىمي جوبالار تالقىلانىپ، ۋنيۆەرسيتەتتەردىڭ باسەكەگە قابىلەتتىلىگىن ارتتىرۋعا باعىتتالعان كەلىسىمدەرگە قول قويىلعان.
تاشكەنتتە مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ فيليالى اشىلادى - «ءوز ا»
وزبەكستان مەن قازاقستاننىڭ جوعارى ءبىلىم مينيسترلىكتەرى اراسىندا 2023 -جىلدىڭ جەلتوقسانىندا ءتيىستى كەلىسىمگە قول قويىلعان ەدى. تاشكەنت وبلىسىنىڭ شىرشىق قالاسىندا مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ فيليالى اشىلادى. سوعان سايكەس مينيسترلەر كابينەتىنىڭ ءتيىستى شەشىمى قابىلداندى، دەپ حابارلايدى وزبەكستاندىق «ءوز ا» اقپاراتتىق اگەنتتىگى.
اتالعان ب ا ق-تىڭ مالىمەتىنشە، وسىعان وراي، فيليال قىزمەتىنىڭ نەگىزگى باعىتتارى ەكونوميكا سالالارى ءۇشىن جوعارى بىلىكتى مامانداردى دايارلاۋ، ءبىلىم، عىلىم جانە ءوندىرىستىڭ ۇزدىكسىزدىگى مەن جۇيەلىلىگى قاعيداتتارى، سونداي-اق الەمنىڭ بەدەلدى ءبىلىم جانە عىلىمي ورتالىقتارىمەن ۇيلەسىمدى ينتەگراتسيا نەگىزىندە ماماندار مەن عىلىمي كادرلاردى دايارلاۋ جانە قايتا دايارلاۋ جۇيەسىن جەتىلدىرىلمەك.
«ۋنيۆەرسيتەت فيليالى كادرلار قاجەتتىلىگىنە قاراي باكالاۆريات جانە ماگيستراتۋرا ماماندىقتارى بويىنشا بارلىق دەڭگەيدەگى مامانداردى دايارلاۋدى، قايتا دايارلاۋدى جانە ولاردىڭ بىلىكتىلىگىن ارتتىرۋدى جۇزەگە اسىرۋ جانە عىلىمي- پەداگوگيكالىق كادرلاردى دايارلاۋدى جۇزەگە اسىرادى»، دەپ جازادى وزبەكستاندىق باسىلىم.
سونداي-اق، وسى اپتادا «ءوز ا» اگەنتتىگىندە «اكسيكەنتتەن كونە قىلىش پەن تيىندار تابىلدى» دەگەن تاقىرىپتاعى اقپارات جاريالاندى.
سونىمەن قاتار نامانگان وبلىسىندا XI-XIV عاسىرعا ءتان كونە قىلىش، باكتريا مەن قىتاي مونەتاسى، جانە عۇلاما ءابۋ ناسىر ءال-فارابيدىڭ كىتابى تابىلعان.
وزبەكستانادىق ب ا ق-تىڭ دەرەگىنشە، ماماندار XI عاسىرعا تيەسىلى دەيتىن قىلىش ۇرىس جاعدايىندا ساقتالعان. ونى اكسيكەنتتىڭ ۇستالارى قاتتى بولاتتان جاساعان. ال ەكىنشى قارۋ XIV عاسىرعا جاتادى جانە ونى ءامىر تەمىردىڭ ارنايى ساربازدارى قولدانعان ەكەن.
اۆتور
بەيسەن سۇلتانۇلى