سپورت ءمينيسترى جۇلدەگەرلەرگە ءتۇرلى سىيلىقتار بەرۋگە قاتىستى پىكىر ايتتى

استانا. KAZINFORM - ءتۇرلى جارىستاردان جۇلدەلى ورالعان سپورتشىلاردى جان-جاقتى قولداۋ كەرەك. بۇل تۋرالى ق ر تۋريزم جانە سپورت ءمينيسترى ەربول مىرزابوسىنوۆ ءمالىم ەتتى.

بۇگىن ءماجىلىستىڭ جالپى وتىرىسىنان كەيىن تىلشىلەر دەمەۋشىلەر تاراپىنان سپورتشىلارعا بەرىلەتىن سىياقىلارعا قاتىستى سۇراق قويدى.

«قازىر جەڭىمپازدار مەن جۇلدەگەرلەرگە پاتەر بەرۋ ماسەلەسى ءتيىستى زاڭدا ەسكەرىلگەن. سونىمەن قاتار، باسقا دا باعالى سىيلىقتار بويىنشا اكىمدىكتەرگە حابارلاسىپ، سپورتشىلارىمىزدى قولداۋ باعىتىندا ءوزارا كەڭەسەمىز. ودان بولەك، ءىرى جارىستاردان كەلگەن جەڭىمپازدارعا ەل ازاماتتارى سىياقى تۇرىندە دەمەۋشىلىك جاساپ، كۇتىپ الادى. جاقسى ناتيجە كورسەتكەن سپورتشىلارعا اۆتوكولىك سىيلاپ، ازاماتتىق تانىتىپ جاتادى»، - دەدى ك. مىرزابوسىنوۆ.

ونىڭ ايتۋىنشا، سپورتشىلار بالا كەزىنەن جوعارى سپورتقا جەتكەنگە دەيىن تەر توگىپ، ەڭبەك ەتەدى. ابىرويلى جارىستاردا ەلدىڭ تۋىن جوعارى كوتەرىپ كەلە جاتقاندار بار.

«ولار پاتريوتتىق سەزىم مەن سالاۋاتتى ءومىر سالتىن ناسيحاتتاۋعا ەلەۋلى ۇلەس قوسىپ كەلەدى. مەنىڭ ويىمشا، سپورتشىنى جان-جاقتى قولداۋ - ول دۇرىس»، - دەدى مينيستر.

بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي- اق نورمالاردىڭ ارتىق زاڭنامالىق رەگلامەنتتەلۋىن بولدىرماۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

اۆتور

رۋسلان عابباسوۆ