قازاقستاندا 44 گرادۋس قىتىمىر اياز تاعى ءۇش كۇن ساقتالادى

قازگيدرومەت سينوپتيكتەرى 12-14-جەلتوقسانعا ارنالعان ءۇش كۇندىك اۋا رايى بولجامىن جاريالادى.

جاڭا اپتا ايازدى اۋا رايىمەن باستالدى. الداعى كۇندەرى دە قازاقستاننىڭ باسىم بولىگىندە اياز ساقتالادى. وعان اركتيكالىق انتيتسيكلون سەبەپ بولىپ وتىر.

12-13-جەلتوقساندا اتموسفەرالىق فرونتتاردىڭ اسەرىنەن رەسپۋبليكانىڭ شىعىسىندا، وڭتۇستىگىندە جانە وڭتۇستىك- شىعىسىندا قار جاۋادى.

12-جەلتوقساندا تاۋلى ايماقتاردا قالىڭ قار جاۋادى.

قازاقستاننىڭ وڭتۇستىگى مەن شىعىسىندا جەل كۇشەيىپ، تاۋلى جەرلەردە تۇمان تۇسەدى.

«12-13-جەلتوقسان تۇندە اۋا تەمپەراتۋراسى تومەندەيدى: سولتۇستىك- باتىستا جانە ورتالىقتا - مينۋس 25-38، سولتۇستىكتە - 30-38 گرادۋس اياز، رەسپۋبليكانىڭ قيىر سولتۇستىگى مەن سولتۇستىك- باتىسىندا - 40-44 گرادۋس اياز. رەسپۋبليكانىڭ شىعىسىندا - 20-38، 14 جەلتوقساندا - 32-38، كەي جەرلەردە مينۋس 40-42 گرادۋسقا دەيىن، وڭتۇستىكتە جانە وڭتۇستىك- شىعىستا -*25-30، تاۋلى ايماقتاردا 33-38 گرادۋس ايازعا دەيىن سۋىتادى» دەيدى قازگيدرومەتتەن.

14-جەلتوقساننان باستاپ اركتيكالىق انتيتسيكلون سولتۇستىك- شىعىس باعىتقا اۋىسادى.

وسىعان بايلانىستى ەلدىڭ باتىس جارتىسىندا سۋىق اۋا ازايا باستايدى.

سونىڭ ناتيجەسىندە اۋا تەمپەراتۋراسى كوتەرىلىپ، تۇندە باتىستا 5-16 ايازعا دەيىن، سولتۇستىك- باتىستا 15-35 ايازعا دەيىن، سولتۇستىكتە 25-38 گرادۋس ايازعا دەيىن وزگەرەدى.
اۆتور
جانات قاپالبايەۆا