سولتۇستىكتە 2050-جىلعا قاراي ادام سانى 1 ميلليونعا ازايۋى مۇمكىن - دەپۋتات
استانا. KAZINFORM - سەنات دەپۋتاتى، پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ مۇشەسى اسەم راحمەتوۆا ەلىمىزدىڭ دەموگرافيالىق جانە كوشى-قون ماسەلەلەرىنە الاڭداتۋشىلىق تانىتتى.
«تاعى ءبىر وزەكتى ماسەلە - ەلىمىزدىڭ گەوگرافيالىق ءار الۋاندىعىنا بايلانىستى حالىقتىڭ قونىستانۋ تىعىزدىعىنىڭ تەڭسىزدىگى مەن ىشكى كوشى-قوننىڭ رەتتەلمەۋى بولىپ وتىر. سوڭعى دەرەكتەرگە سۇيەنسەك استانا، الماتى، شىمكەنت سياقتى ءىرى قالالار، سونداي-اق اگلومەراتسيالار نەگىزگى كوشى-قون اعىنىن تارتىپ وتىر. ال ولاردىڭ ينفراقۇرىلىمى وعان توتەپ بەرە الماۋدا»، - دەدى اسەم راحمەتوۆا سەناتتا وتكەن ۇكىمەت ساعاتىندا.
حالىق قالاۋلىسى كەلتىرگەن مالىمەتكە سايكەس، 2050-جىلعا قاراي ەلدىڭ وڭتۇستىك وڭىرلەرىندە حالىق سانى 5,2 ميلليونعا ارتىپ، سولتۇستىكتە 1 ميلليون ادامعا ازايۋى مۇمكىن.
«ءوڭىرارالىق ەرەكشەلىككە سايكەس وڭتۇستىك ايماق - تۋۋ كورسەتكىشىنىڭ جوعارىلىعىمەن، حالىقتىڭ قونىستانۋىنىڭ تىعىزدىعىمەن، جەر رەسۋرستارىنىڭ تاپشىلىعىمەن، جۇمىس كۇشىنىڭ جىل سايىنعى ارتۋىمەن ەرەكشەلەنەدى (2023-جىلعى 1- توقساندا وڭتۇستىك وڭىرلەردەگى جۇمىسسىزدىق دەڭگەيى %5 بولعان). كەرىسىنشە سولتۇستىك ايماق - حالىقتىڭ تىعىزدىعىنىڭ تومەندىگى، ەڭبەككە قابىلەتتى جاستاردىڭ وڭىردەن كەتۋى، قارتايۋ ءۇردىسى، تۋۋ مەن ەكونوميكالىق بەلسەندىلىكتىڭ قۇلدىراۋىمەن ەرەكشەلەنىپ وتىر»، - دەيدى ول.
ونىڭ ايتۋىنشا، ەلدىڭ دامۋ پەرسپەكتيكاسىنا ىشكى كوشى-قوننىڭ قازىرگى تەندەنتسياسى قولايسىز.