سولتۇستىك قازاقستاننىڭ بەس اۋدانىندا ءىرى قارا مالدان برۋسەللەز انىقتالدى

پەتروپاۆل. KAZINFORM - سولتۇستىك قازاقستان وبلىسىندا رەسپۋبليكالىق ەپيزووتيالىق كوميسسيا جۇمىس ىستەپ جاتىر.

وڭىردەگى لەنينسكوە ەلدى مەكەنىندە بىلتىردان بەرى برۋسەللەز اۋرۋى تىيىلماي تۇر.

س ق و ۆەتەريناريا باسقارماسى باسپا ءسوز قىزمەتىنىڭ مالىمەتىنشە، ايىرتاۋ اۋدانىنداعى شالقار ەلدى مەكەنىندە «يۋليا» شارۋا قوجالىعىندا جانە تيميريازيەۆ اۋدانى دوكۋچايەۆو ەلدى مەكەنىندەگى «اتامەكەن- اگرو تيميريازيەۆو» ج ش س- دە ءبىر- ءبىر مالدان برۋتسەللەز انىقتالعان. تاعى بەس اۋرۋ ءىرى قارا مال قىزىلجار اۋدانى پلوسكوە ەلدى مەكەنىندەگى ەكى تۇرعىننىڭ قوراسىنان تابىلدى. اققايىڭ اۋدانى لەنينسكوە ەلدى مەكەنىندە دە ءبىر مالدان برۋتسەللەز انىقتالدى.

«سوڭعىسى 25-ناۋرىز كۇنى اقجار اۋدانى تالشىق ەلدى مەكەنىندە انىقتالدى. اۋرۋدى جۇقتىرعان ءىرى قارانىڭ بارلىعىنىڭ كوزى جويىلدى. ەندى ءار 15-20 كۇن سايىن اۋرۋ مال انىقتالعان شارۋاشىلىقتاردان نەمەسە قوراداعى مالدان برۋتسەللەزگە پ ت س ر الىنىپ، تەكسەرىلەدى. تالداۋ ناتيجەسى ەكى مارتە تەرىس كەلگەن جاعدايدا شەكتەۋ شارالارى قولدانىلمايدى»، - دەيدى ۆەدومستۆونىڭ باسپا ءسوز حاتشىسى امانجول نۇرتازين.

شەكتەۋ شارالارى ەنگىزىلگەن جاعدايدا ەلدى مەكەننەن مالدى، مال ونىمدەرىن شىعارۋعا تىيىم سالىنادى.

«بۇل اۋدانداردىڭ ىشىندە قازىر تەك اققايىڭ اۋدانى لەنينسكوە ەلدى مەكەنىندە عانا شەكتەۋ شارالارى بار. بۇل ەلدى مەكەندە اۋرۋ مال العاش رەت بىلتىر 4-شىلدە كۇنى انىقتالعان. سودان بەرى شەكتەۋ الىنعان جوق، ويتكەنى، پ ت س ر قايتا- ايتا اۋرۋدىڭ بارلىعىن كورسەتىپ جاتىر. قازىر بۇل جەردە رەسپۋبليكالىق ەپيزووتيالىق كوميسسيا جۇمىس ىستەپ جاتىر»، - دەيدى امانجول نۇرتازين.

باسقارمانىڭ مالىمەتىنشە، بىلتىر 272 ءىرى قارا مالدان جانە 2 قوي-ەشكىدەن برۋسەللەز تابىلىپ، اۋرۋ مالدىڭ كوزى جويىلدى.