سولتۇستىك قازاقستاندا قۇتىرما اۋرۋى بار تۇلكى اۋىلعا كىرىپ كەتتى

پەتروپاۆل. KAZINFORM - سولتۇستىك قازاقستان وبلىسىندا اۋىل تۇرعىنىنىڭ قوراسىنا كىرىپ كەتكەن تۇلكىدەن قۇتىرما اۋرۋى انىقتالدى.

س ق و ۆەتەريناريا باسقارماسىنىڭ مالىمەتىنشە، وقيعا 28-مامىر كۇنى عابيت مۇسىرەپوۆ اتىنداعى اۋداننىڭ ستاروبەلكا ەلدى مەكەنىندە بولعان. ءۇيدىڭ اۋلاسىنا كىرگەن تۇلكىنى تۇرعىن قوراعا قاماپ، بىردەن ۆەتەرينارلىق قىزمەتكە حابار بەرگەن.

«تۇلكىنىڭ اۋرۋ ەكەنى سىرتقى بەلگىلەرىنەن- اق كورىنىپ تۇردى، شابۋىلداپ، اۋزىنان سىلەكەي اقتى. سوندىقتان ولتىرۋگە تۋرا كەلدى. 3-ماۋسىم كۇنى زەرتحانا قورىتىندىسى كەلىپ، جابايى جانۋاردا قۇتىرما اۋرۋى بولعانى راستالدى»، - دەيدى ۆەدومستۆونىڭ باسپا ءسوز حاتشىسى امانجول نۇرتازين.

اۋىل تۇرعىنىنىڭ ايتۋىنشا، اۋرۋ تۇلكىمەن تىكەلەي بايلانىس بولماعان. سوعان قاراماستان ۆەتەرينارلىق تالاپتارعا سايكەس ونىڭ اۋلاسىنا شەكتەۋ شاراسى قولدانىلماق.

«بىرلىك اۋىلدىق وكرۋگىنىڭ اكىمى تۇرعىن ءۇي اۋماعىندا شەكتەۋ شارالارىن بەلگىلەۋ تۋرالى شەشىم قابىلدايدى. وسىدان كەيىن رەسپۋبليكالىق ەپيزووتيالىق وترياد ۆيرۋستىڭ تارالۋىنا جول بەرمەۋ ماقساتىندا تۇلكى تۇرعان قورانى جانە اۋلانى دەزينفەكتسيالايدى. بۇدان بولەك تۇرعىننىڭ بارلىق ءۇي جانۋارىنا - 8 قوي، ەكى مىسىق پەن يتىنە قۇتىرما اۋرۋىنا قارسى ەكپە ەگىلەدى»، - دەيدى امانجول نۇرتازين.

س ق و- دا سوڭعى رەت قۇتىرما اۋرۋى 2021 -جىلى تىركەلگەن ەكەن.