سولتۇستىك قازاقستاندا اراق-شاراپتان مۇلدە باس تارتقان بەس اۋىل بار

 پەتروپاۆل. KAZINFORM - سولتۇستىك قازاقستان وبلىسىندا بىلتىر 219 ادام ءماجبۇرلى تۇردە ماسكۇنەمدىكتەن ەمدەلۋگە جىبەرىلدى، ونىڭ 120 سى بۇعان دەيىن دە ناركولوگيالىق ديسپانسەردە ەم العان.

س ق و پوليتسيا دەپارتامەنتىنىڭ باستىعى ايدىن قابدۇلدينوۆتىڭ ايتۋىنشا، ماسكۇنەمدىك - قوعامنىڭ ۇلكەن پروبلەماسىنا اينالعان. ستاتيستيكا بويىنشا، قىلمىستاردىڭ تورتتەن ءبىرى ماس كۇيدە جاسالادى.

«الكوگوليزممەن كۇرەسۋ ءۇشىن بارلىق شارالاردى قولعا الىپ جاتىرمىز. سونىڭ ءبىرى - ماسكۇنەمدەردى ءماجبۇرلى تۇردە ەمدەتۋ. ءبىراق، وكىنىشكە وراي، ءبىر ادامدى بىرنەشە رەت ەمدەتۋگە تۋرا كەلىپ جاتادى. بىلتىر 200 دەن اسا ادام ناركولوگيالىق ورتالىققا جاتقىزىلسا، سونىڭ جارتىسىنان استامى ول جەرگە قايتا تۇسكەن.

ەكىنشى باعىتى - زاڭسىز اينالىمنان سپيرتتىك ىشىمدىكتەردى الۋ. بىلتىر اراق- شاراپتى زاڭسىز ساتۋدىڭ 300 گە جۋىق دەرەگى انىقتالىپ، 12 مىڭ ليتر الكوگول تاركىلەندى»، - دەيدى ايدىن قابدۇلدينوۆ.

سپيرتتىك ىشىمدىكتەر ساتىپ، زاڭسىز پايدا تاپقان 559 ادام پوليتسەيلەردىڭ ەسەبىنە الىندى. جالپى زاڭنامانى بۇزعاندارعا 10 مىڭ اكىمشىلىك حاتتاما تولتىرىلعىن.

«وبلىستا اراق-شاراپتان تولىق باس تارتقان بەس اۋىل بار، ولار: تايىنشا اۋدانىنداعى تەڭدىك اۋىلى، ايىرتاۋ اۋدانىنداعى قاراساي باتىر جانە بىرلەستىك اۋىلدارى، ەسىل اۋدانىنىڭ قاراعاي اۋىلى جانە ع. مۇسىرەپوۆ اتىنداعى اۋداننىڭ كوۆىلنوە ەلدى مەكەنى.

بۇل اۋىلداردا بارلىق توي-تومالاق سپيرتتىك ىشىمدىكتەرسىز وتەدى. دۇكەندەرىندە الكوگول ساتىلمايدى»، - دەيدى دەپارتامەنت باستىعى.

سونداي- اق بىلتىر كولىكتى ماس كۇيدە باسقارعان 1164 جۇرگىزۋشى انىقتالىپ، ءتيىستى جازاسىن العان.