سولتۇستىك قازاقستان وبلىسىنىڭ بۇرىنعى اكىمى الاياقتىق ءۇشىن سوتتالدى

پەتروپاۆل. KAZINFORM - سولتۇستىك قازاقستان وبلىسىنىڭ ەكس- اكىمى سامات ەسكەندىروۆ ۇلەسكەرلەردىڭ جەرىن الداۋ ارقىلى ساتىپ جىبەرگەنى ءۇشىن سوتتالدى. اقمولا وبلىستىق سوتىنىڭ مالىمەتىنشە، قىلمىستىق ءىس شامامەن جارتى جىل بويى كوكشەتاۋ قالالىق سوتىندا قارالدى.

«ە. جانە ەكىنشى ادام نەسيە الۋ ماقساتىندا، ج ش س- ءى قاتىسۋشىلارىنىڭ كەلىسىمىنسىز جينالىستاردىڭ جالعان حاتتامالارىن قۇراستىرىپ، بۋراباي اۋدانى تۇرعىندارىنىڭ جەر تەلىمدەرىن بانككە كەپىلگە بەرگەن. وسىلايشا ءسوز بايلاسۋ ارقىلى اۋىل تۇرعىندارىنىڭ شارتتى جەر ۇلەستەرىنىڭ قۇقىعىن يەمدەنىپ، مۇلىكتى كەپىلگە قويۋ جانە ج ش س- ءنىڭ ۇلەستەس كاسىپورىنا جەر تەلىمىنە قۇقىقتى يەلىكتەن شىعارۋ جولىمەن جابىرلەنۋشىلەرگە اسا ءىرى مولشەردە ماتەريالدىق زيان كەلتىردى»، - دەلىنگەن باسپا ءسوز حابارلاماسىندا.

ەسكەردىروۆتىڭ كىناسى جابىرلەنۋشىلەردىڭ، كۋاگەرلەردىڭ جاۋاپتارىمەن، جۇرگىزىلگەن ءتىنتۋ بارىسىندا تاركىلەنگەن تولەم قۇجاتتارىمەن، سونداي-اق ساراپشىلار مەن تاۋەلسىز اۋديتوردىڭ قورىتىندىلارىمەن دالەلدەندى.

دەسەك تە جابىرلەنۋشىلەردىڭ كوپشىلىگى سوتتالۋشىعا قاتاڭ جازا قولدانباۋدى سۇرادى. سوت ولاردىڭ پىكىرىن ەسكەردى.

«سونداي- اق، 2023 -جىلعى سوت اكتىلەرىمەن ج ش س- ءنىڭ قۇرىلتايشىلارى جينالىسىنىڭ شەشىمى مەن قۇقىقتاردى ءۇشىنشى تۇلعالارعا بەرۋ تۋرالى كەلىسىمنىڭ كۇشى جويىلدى. ياعني سوتتا قارالعان ءىس بويىنشا جابىرلەنۋشىلەرگە جەر تەلىمى قايتارىلدى، سوندىقتان اۋىل تۇرعىندارىنا كەلتىرىلگەن ماتەريالدىق شىعىندى وتەۋگە نەگىز جوق»، - دەلىنگەن حابارلامادا.

ناتيجەسىندە، سوت ەسكەندىروۆتى شارتتى تۇردە 5 جىلعا باس بوستاندىعىنان ايىرۋ جازاسىن تاعايىندالدى.

سوت اكتىسى زاڭدى كۇشىنە ەنگەن جوق.

2024 -جىلدىڭ جازىندا 2013- 2014 -جىلدارى سولتۇستىك قازاقستان وبلىسىنىڭ اكىمى بولعان سامات ەسكەندىروۆكە قاتىستى سوت پروتسەسى باستالعانى بەلگىلى بولعان. 2014 -جىلى وبلىستا قۇرىلىس باسقارماسى باسشىلارى مەن اكىم ورىنباسارلارىنىڭ قىزمەتىنە قاتىستى زاڭبۇزۋشىلىقتار انىقتالعان سوڭ قىزمەتىنەن كەتكەن.

ەسكەندىروۆ ەڭبەك جولىندا جامبىل جانە قىزىلجار اۋداندارىنىڭ اكىمى قىزمەتتەرىن دە اتقارعان، 2011- 2013 -جىلدارى ق ر پارلامەنتى سەناتىنىڭ دەپۋتاتى بولعان.

اۆتور

اقەركە داۋرەنبەك قىزى