سولتۇستىك قازاقستان وبلىسى كوشپەندىلەر ويىندارىنا «قامىسقۇلاق» اتتى تۇلپاردى جاراتىپ جاتىر

پەتروپاۆل. KAZINFORM – استانادا وتەتىن دۇنيەجۇزىلىك كوشپەندىلەر ويىندارىنا سولتۇستىك قازاقستان وبلىسى دا قاتىسىپ، قازاقستان قۇراماسىندا ونەر كورسەتپەك.

قازىرگى ۋاقىتتا اتبەگىلەر كوپتەگەن جارىستاردا الدىنا جان سالماعان «اكۆامارين» جانە «قامىسقۇلاق» اتتى تۇلپارلاردى جاراتىپ جاتىر.

س ق و دەنە شىنىقتىرۋ جانە سپورت باسقارماسىنىڭ مالىمەتىنشە، «اكۆامارين» اتتى سايگۇلىك ازيا كۋبوگىنىڭ بەس دۇركىن جەڭىمپازى، ات سپورتى تۇرلەرىنەن وبلىس كۋبوگىندا جەتى شاقىرىم قاشىقتىقتاعى جورعا جارىستا مارە سىزىعىن ءبىرىنشى بولىپ كەسىپ ءوتتى. ايىرتاۋ اۋدانىندا وتكەن ۇلتتىق سپورت تۇرلەرىنىڭ وبلىستىق فەستيۆالىندە جانە الماتى وبلىسىنىڭ كۋبوگىندا كەزەكتى جەڭىسكە جەتتى.

«توعىز جاسار فرانسۋز جىلقىسى بابىندا، وتە ەڭبەكقور، جىگەرلى، يكەمدى ءارى اقىلدى. وعان قانداي تالاپ قويىلعانىن بىردەن ۇعادى. جالپى «اكۆامارين» قازىر يپپودرومداعى ەڭ مىقتى جىلقىلاردىڭ ءبىرى»، - دەيدى ات سپورتىنان ق ر سپورت شەبەرى ەۆگەني چيبيسوۆ.

«قامىسقۇلاق» اتتى ەكى جاسار قۇناندى V دۇنيەجۇزىلىك كوشپەندىلەر ويىندارىندا ونەر كورسەتۋگە اتبەگى قۋانىش شاحامبايەۆ دايىنداپ جاتىر. قۋانىش كەزىندە ات جارىستاردا جوكەي رەتىندە ونەر كورسەتتى، ال قازىر جارىستارعا جىلقىلاردى جاراتۋمەن اينالىسادى. «قامىسقۇلاق» تامىز ايىنىڭ باسىندا پاۆلودار وبلىسىندا وتكەن قازاقستان چەمپيوناتىندا قۇنان بايگەگە قاتىستى. ون شاقىرىم قاشىقتىقتى وڭاي ەڭسەرىپ، جەڭىسكە جەتتى. ەندى V دۇنيەجۇزىلىك كوشپەندىلەر ويىندارىندا 11 ك م قاشىقتىقتاعى قۇنان بايگەگە قاتىسادى.

اۆتور

اقەركە داۋرەنبەك قىزى