س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 5-قازاننان باستالعان رەيدتەرگە كۇن سايىن شامامەن 700 ادام قاتىسىپ جاتىر. پوليتسەيلەر، پروباتسيا قىزمەتكەرلەرى، اسكەري قىزمەتشىلەر مەن قوعام بەلسەندىلەرى تۇرعىن ۇيلەردى، ساياجايلاردى، فەرمەرلىك شارۋاشىلىقتار مەن قاراۋسىز قالعان عيماراتتاردى تەكسەرىپ جاتىر.
ءىس-شارا بارىسىندا 2 مىڭنان استام نىسان تەكسەرىلىپ، ماماندار ەسەپتە تۇرعان 1,9 مىڭعا جۋىق ادامنىڭ ۇيىنە باردى. ناتيجەسىندە 13 قۇقىق بۇزۋ انىقتالىپ، شارتتى تۇردە مەرزىمىنەن بۇرىن بوساتىلعان ءتورت ادامنىڭ جازاسىن قايتا قاراۋ ءتىرالى ءتورت ءوتىنىشحات سوتقا جولداندى.
سونداي-اق زاڭسىز جالعا بەرىلگەن 23 پاتەر تۋرالى مالىمەت مەملەكەتتىك كىرىستەر ورگاندارىنا جىبەرىلدى. رەيد بارىسىندا تىركەلمەگەن ءۇش قارۋ تاركىلەندى. ۇستالعان 69 ءۇيسىز ادامنىڭ تورتەۋى پەتروپاۆل قالاسىنىڭ قابىلداپ-تاراتۋ ورنىنا جىبەرىلدى. ەل اۋماعىندا زاڭسىز جۇرگەن 120 شەتەلدىك انىقتالدى.
پوليتسەيلەر كامەلەتكە تولماعان 12 جاس ءوسپىرىمدى ۇستاپ، ولاردىڭ جەتەۋى بەيىمدەۋ ورتالىعىنا ورنالاستىرىلدى. بۇدان بولەك، ەسىرتكى جارناماسى بار توعىز جازۋ انىقتالعان.
پروفيلاكتيكالىق ءىس-شارا 5-قاراشاعا دەيىن جالعاسادى. ونىڭ ماقساتى - تۇرعىن ءۇي سەكتورىنداعى قاۋىپسىزدىكتى قامتاماسىز ەتۋ، قۇقىق بۇزۋدىڭ الدىن الۋ جانە كوشى-قون زاڭناماسىنىڭ ساقتالۋىن باقىلاۋ.