قوزىبايەۆ ۋنيۆەرسيتەتى باسپا ءسوز قىزمەتىنىڭ مالىمەتىنشە، قازىر وڭىردە شامامەن 150 دارىگەر جەتىسپەيدى. وسىعان بايلانىستى سوڭعى ۋاقىتتا وبلىستا مەديتسينالىق ۋنيۆەرسيتەت اشۋ تۋرالى باستاما ءجيى كوتەرىلىپ ءجۇر. الايدا سالاعا قاجەتتى ماماندار دايارلاۋ ءىسى وڭىردە بۇعان دەيىن دە جۇرگىزىلىپ كەلگەن.
جەرگىلىكتى جوعارى وقۋ ورنىندا 2018-جىلى مەديتسينالىق فاكۋلتەت اشىلدى. ءبىراق ليتسەنزيالىق تالاپتاردىڭ وزگەرۋىنە بايلانىستى سوڭعى ءۇش جىلدا تالاپكەرلەردى قابىلداۋ توقتاتىلدى. بۇگىندە قاجەتتى ليتسەنزيالار جاڭارتىلىپ، جاڭا وقۋ جىلىنا ستۋدەنتتەردى قايتا قابىلداۋ جوسپارلانىپ وتىر.
ۋنيۆەرسيتەتتىڭ باسقارما ءتوراعاسى ەربول يساقايەۆتىڭ ايتۋىنشا، وبلىستىق دەنساۋلىق ساقتاۋ باسقارماسىمەن مەموراندۋم جاسالىپ، 15 كلينيكالىق تاجىريبە بازاسىمەن قامتاماسىز ەتىلگەن. سونداي-اق مەديتسينالىق فاكۋلتەت زاماناۋي ماتەريالدىق-تەحنيكالىق بازامەن قامتاماسىز ەتىلگەن. ستۋدەنتتەردىڭ تاجىريبەلىك دايىندىعىن كۇشەيتۋ ماقساتىندا UniMed ستۋدەنتتىك ەمحاناسى قايتا قۇرىلىپ، مەديتسينالىق قىزمەت كورسەتۋگە بەيىمدەلۋ ۇستىندە. بۇل ەمحانا دا بولاشاق دارىگەرلەر مەن ينتەرندەر ءۇشىن قوسىمشا تاجىريبە الاڭىنا اينالادى.
قوزىبايەۆ ۋنيۆەرسيتەتىندە باكالاۆريات بويىنشا «جالپى مەديتسينا»، «فارماتسيا» جانە «مەديتسينا» ءبىلىم بەرۋ باعدارلامالارى بار. ماگيستراتۋرا مەن رەزيدەنتۋرا دا قاراستىرىلعان. كادر تاپشىلىعىن ەسكەرە وتىرىپ، بيىلدان «ستوماتولوگيا» باعىتىن اشۋ جوسپارلانىپ وتىر. بۇل باكالاۆريات پەن ينتەرناتۋرا دەڭگەيلەرىن قامتيدى. جاڭا وقۋ جىلىندا ءۇندىستان، قىتاي، سيريا، يوردانيا، بانگلادەش، وزبەكستان جانە رەسەيدەن شەتەلدىك ستۋدەنتتەردى قابىلداۋ كوزدەلگەن.
بيىل وقۋ ورنىن 98 ستۋدەنت ءتامامدايدى. ونىڭ 44 ءى بەيىندىك ينتەرناتۋرا تۇلەكتەرى بولسا، 6 ستۋدەنت «فارماتسيا» باعىتى بويىنشا بىتىرەدى. قالعاندارى «مەديتسينا» باعدارلاماسىنىڭ تۇلەكتەرى. ۋنيۆەرسيتەت مالىمەتىنشە، بارلىق بىتىرۋشىلەر بولاشاق جۇمىس ورىندارىمەن قامتىلعان.