سولتۇستىك پەن شىعىستا حالىق قارتايىپ بارادى

  استانا. KAZINFORM - قازاقستاندا قارتايۋ يندەكسى ءبىر جىلدا 1,3 پايىزدىق تارماققا ءوستى، دەپ حابارلايدى ۇلتتىق ستاتبيۋرو.

2023 -جىلى قازاقستاندا قارتايۋ يندەكسى 29,5 كە جەتتى، بۇل ءبىر جىل بۇرىنعىدان 1,3 پايىزدىق تارماققا جوعارى (2022 -جىلى 28,2)

بۇل دەگەنىمىز — 0 مەن 15 جاس ارالىعىنداعى ءاربىر 100 بالاعا 65 جاستان اسقان 29,5 ازامات كەلەدى.

بەس جىل بۇرىنعى دەرەكتەرمەن سالىستىرعاندا (2019 -جىلى 26,5) قارتايۋ يندەكسى ايتارلىقتاي وسكەنىن كورۋگە بولادى.

وڭىرلەر بويىنشا بولىنىستە ايتارلىقتاي ايىرماشىلىق بار: قارتايۋدىڭ ەڭ جوعارى يندەكسى سولتۇستىك قازاقستان وبلىسىندا — 72,9، ودان كەيىن شىعىس قازاقستان وبلىسى 71,8 جانە قوستاناي وبلىسى — 62,1 تۇر.

قارتايۋ يندەكسى ەڭ تومەن وڭىرلەر اراسىندا ماڭعىستاۋ وبلىسى كوش باستاپ تۇر، وندا 100 بالاعا 65 جاستان اسقان 14,3 ازامات كەلەدى.

تومەن كورسەتكىشتەر تۇركىستان وبلىسىندا (14,9) جانە شىمكەنت قالاسىندا (15,3) تىركەلدى.

ايتا كەتەيىك، قالالىق جەرلەردە قارتايۋ يندەكسى جوعارى — 32، ال اۋىلدىق جەرلەردە بۇل كورسەتكىش تومەن — 25,8.