سولتۇستىك ماكەدونياداعى ورتكە قاتىستى ون ادام ۇستالدى

استانا. KAZINFORM - سوڭعى مالىمەتتەر ويىنشا 59 ادام مەرت بولىپ، 155 ادام زارداپ شەككەن سولتۇستىك ماكەدونياداعى تۇنگى كلۋبتا بولعان ءورت بويىنشا جۇرگىزىلگەن تەكسەرۋ بارىسىندا پوليسيا 10 ادامدى ۇستادى، دەپ حابارلايدى BBC.

ءورت سەنبىدەن جەكسەنبىگە قاراعان ءتۇنى جەرگىلىكتى ۋاقىت بويىنشا ساعات 2:30 دا كوچاني قالاسىنداعى Pulse كلۋبىندا بولعان. وندا جەرگىلىكتى تانىمال دنك توبىنىڭ كونسەرتىنە 500 گە جۋىق ادام جينالعان.

الدىن الا مالىمەتتەر بويىنشا، ءورت پيروتەحنيكانى پايدالانۋدىڭ سالدارىنان تۋىنداعان.

سولتۇستىك ماكەدونيا رەسپۋبليكاسى پروكۋراتۋراسىنىڭ وكىلى بيليانا ارسوۆسكا بي- بي- سي- گە بەرەن سۇحباتىندا كلۋبقا ليتسەنزيا بەرگەن شەنەۋنىكتەردى قوسا العاندا قايعىلى جاعدايعا قاتىسى بولۋى مۇمكىن 10 كۇدىكتىنى ۇستاۋ تۋرالى قاۋلى شىعارىلعانىن حابارلادى.

الدىندا ب ا ق وكىلدەرى كلۋب يەسىنىڭ ۇستالعانىن حابارلاعان بولاتىن.

پروكۋراتۋرا وكىلى سونىمەن قاتار، كلۋبتا ءبىر عانا شىعاتىن جەر بولعانىن، عيماراتتىڭ ارتىنداعى ەسىكتىڭ قۇلىپتالىپ تۇرعانىن، سوعان قاراي ونى پايدالانۋ مۇمكىن بولماعانىن جەتكىزدى.

سونداي-اق ءورت بولعان جەرگە جۇرگىزىلگەن العاشقى تەكسەرۋ كەزىندە بىرنەشە تۇسىنىكسىز جاعداي انىقتالعان.

- ءورت ءسوندىرۋ جانە نايزاعايدان قورعاۋ جۇيەسىندە كەمشىلىكتەر بولدى، - دەدى پروكۋراتۋرا وكىلى بي- بي- سي Newshour باعدارلاماسىنىڭ ەفيرىندە.

ارسوۆسكا سونىمەن قاتار سول كۇنى كونتسەرت قويعان دنك توبىنىڭ ءبىر عانا مۇشەسى امان قالعانىن ايتتى جانە ول اۋرۋحانا جاتىر. توپتىڭ قالعان مۇشەلەرى مەرت بولدى.

وسىعان دەيىن سولتۇستىك ماكەدونيادا تۇنگى كلۋبتاعى ورتتەن 51 ادام كوز جۇمعانى تۋرالى جازدىق.

مەملەكەت باسشىسى سولتۇستىك ماكەدونيا پرەزيدەنتىنە كوڭىل ايتۋ جەدەلحاتىن جولدادى.