سولتۇستىك كورەيا تۋريزم ءۇشىن اشقان شەكاراسىن شۇعىل جاپتى

استانا. KAZINFORM - باتىس تۋريستىك اگەنتتىكتەرى شەتەلدىك تۋريستەر بۇدان بىلاي سولتۇستىك كورەيانىڭ قىتايمەن شەكارالاس راسون قالاسىنا بارا المايتىنىن مالىمدەدى. پحەنياننىڭ بەس جىل وقشاۋلانعاننان كەيىن شەكاراسىن تۋريزم ءۇشىن قايتا اشۋ تۋرالى جۋىرداعى شەشىمى كەنەتتەن جويىلدى، دەپ حابارلايدى BBC.

ك ح د ر Covid-19 ۆيرۋسىنىڭ تارالۋىن بولدىرماۋ ءۇشىن 2020 -جىلدىڭ باسىندا شەكارالارىن جاپتى، سودان كەيىن قىتايدان ازاماتتارىنىڭ زاڭسىز كىرۋىنە جول بەرمەۋ ءۇشىن سولتۇستىك شەكاراسى بويىنداعى قورعانىستى كۇشەيتتى.

سودان بەرى سولتۇستىك كورەيا رەسەي مەن قىتايدىڭ قولداۋىنا سۇيەنىپ، الەم ەلدەرىنىڭ كوپ بولىگىنەن وقشاۋلانىپ قالدى.

اقپان ايىندا باتىستىڭ بىرنەشە تۋروپەراتورلارى سولتۇستىك كورەيا تاراپىنان رۇقسات العاننان كەيىن ك ح د ر سولتۇستىك- شىعىسىنداعى راسون قالاسىنا ساياحاتشىلاردىڭ ازداعان سانىن جىبەرگەنىن حابارلادى.

ءبىراق سارسەنبىدە كەيبىر تۋريستىك كومپانيالار بۇل ساپارلار تۇسىنىكسىز سەبەپتەرمەن توقتاتىلعانىن مالىمدەدى.

- سەرىكتەستەر بىزگە راسونعا تۋرلار توقتاتىلعانىن حابارلادى، - دەلىنگەن Young Pioneer Tours تۋريستىك اگەنتتىگىنىڭ سايتىنداعى حابارلامادا.

Koryo Tours تۋريستىك اگەنتتىگى «راسون ۋاقىتشا جابىلعانىن»، ال ونىڭ بەيجىڭدە ورنالاسقان باس مەنەدجەرى سايمون كوكەرەلل AFP اگەنتتىگىنە سولتۇستىك كورەياداعى تۋريستەر «ساپارىن جوسپارلانعانداي اياقتايتىنىن» ايتتى.

يسپانيانىڭ KTG تۋريستىك اگەنتتىگىنىڭ تۋرلار ۇيلەستىرۋشىسى رايكو ۆەگا دا AFP اگەنتتىگىنە ك ح د ر-عا تۋرلاردىڭ توقتاتىلعانىن راستاپ: «ءبىز ونىڭ سەبەبىن جانە ونىڭ قانشا ۋاقىتقا سوزىلاتىنىن بىلمەيمىز»، - دەپ قوستى.

سولتۇستىك كورەيا بىرنەشە حالىقارالىق ساۋدا جانە رەسمي دەلەگاتسيالاردى قابىلدادى، ال وتكەن جىلى پاندەميادان كەيىن العاش رەت رەسەيلىك تۋريستەرگە ەلگە كىرۋگە رۇقسات بەردى.
قىتاي جانە رەسەي شەكارالارىنا جاقىن ورنالاسقان راسون 1991 -جىلى سولتۇستىك كورەيانىڭ ءوزىنىڭ ۆيزالىق رەجيمى بار العاشقى ارنايى ەكونوميكالىق ايماعى بولدى.

اۆتور

زارينا تۋعانبايەۆا