سولتۇستىك كورەيانىڭ رەسمي اقپارات اگەنتتىگى KCNA سىناقتاردىڭ 6، 7 جانە 8-ساۋىردە جالعاسقانىن جانە ول زەنيتتى قارۋلاردىڭ، ەلەكتروماگنيتتى قارۋ جۇيەلەرىنىڭ جانە كومىرتەكتى تالشىقتى بومبالاردىڭ كورسەتىلىمىن قامتىعانىن حابارلادى.
KCNA اقپارات اگەنتتىگى سوڭعى سىناقتارعا يادرولىق وقتۇمسىقتاردى تاسىمالداۋعا قابىلەتتى «حۆاسون-11» بالليستيكالىق زىمىراندارىنا ورناتىلعان كلاستەرلىك وق-ءدارى جۇيەلەرىنىڭ كورسەتىلىمى كىرگەنىن اتاپ ءوتتى. بۇل زىمىراندار زىمىرانعا قارسى قورعانىس جۇيەلەرىنەن اينالىپ ءوتۋ ءۇشىن تومەن بيىكتىكتە ۇشۋعا ارنالعان. باياندامادا مۇنداي وقتۇمسىقتارمەن قارۋلانعان قىسقا قاشىقتىققا ۇشاتىن زىمىراننىڭ «6,5 تەن 7 گەكتارعا دەيىنگى اۋماقتى الىپ جاتقان كەز كەلگەن نىسانانى كۇلگە اينالدىرا الاتىنى» ايتىلعان.
2019-جىلى ا ق ش پرەزيدەنتى دونالد ترامپپەن يادرولىق كەلىسسوزدەر ءساتسىز اياقتالعاننان كەيىن، سولتۇستىك كورەيا كوشباسشىسى كيم چەن ىن سەۋل مەن ۆاشينگتونمەن ديپلوماتيالىق قارىم-قاتىناستى تولىعىمەن توقتاتتى جانە سودان بەرى يادرولىق قارۋعا قابىلەتتى زىمىران ازىرلەۋدى جەدەلدەتتى.
وتكەن جىلدىڭ سوڭىندا سولتۇستىك كورەيا يادرولىق سۇڭگۋىر قايىعىنىڭ سۋرەتتەرىن جاريالادى.
سونداي-اق بۇعان دەيىن ك ح د ر قۇرلىقارالىق زىمىراندارعا ارنالعان قۋاتتى قوزعالتقىشتى سىناقتان وتكىزگەنى حابارلانعان بولاتىن.