كورەيانىڭ ورتالىق تەلەگراف اگەنتتىگىنىڭ (تستاك) مالىمەتىنشە، سىناق سەنبى كۇنى وتكىزىلگەن. سولتۇستىك كورەيانىڭ زىمىران باسقارماسى كاسسەتالىق وقتۇمسىقتىڭ جاۋىنگەرلىك جاعدايدا قولدانۋعا جارامدىلىعى مەن جويقىن كۇشىن تەكسەرگەن.
سىناقتى كورەيا ەڭبەك پارتياسى ورتالىق كوميتەتى ءبولىمىنىڭ ءبىرىنشى ورىنباسارى، ورتالىق اسكەري كوميسسيا مۇشەسى گەنەرال كيم چەن سيك باقىلاعان.
كاسسەتالىق وق- ءدارى جارىلعان كەزدە ونداعان، ءتىپتى جۇزدەگەن شاعىن وقتۇمسىققا ءبولىنىپ، كەڭ اۋماقتاعى بىرنەشە نىساناعا سوققى بەرە الادى.
ستاك مالىمەتىنشە، زىمىران باسقارماسىنا قاراستى عىلىمي- زەرتتەۋ ينستيتۋتتارى «№2 ستاندارتتى ۇلگىدەگى كاسسەتالىق وقتۇمسىق» 12-13 گەكتار اۋماقتى جوعارى تىعىزدىقتاعى جويقىن كۇشپەن كۇلگە اينالدىرۋعا قابىلەتتى ەكەنىن راستاعان.
زىمىران باسقارماسىنىڭ باس ديرەكتورى كاسسەتالىق وقتۇمسىقتار ماقساتىنا قاراي ءتورت ساناتقا بولىنەتىنىن مالىمدەدى. ونىڭ ايتۋىنشا، جىل سوڭىنا دەيىن اسكەري بولىمشەلەرگە وپەراتسيالىق مىندەتتەر مەن نىسانالاردىڭ ەرەكشەلىكتەرىنە قاراي وسى تۇرلەردىڭ بارلىعىن تاڭداپ قولدانۋ مۇمكىندىگى بەرىلەدى.
بيىل ساۋىردە سولتۇستىك كورەيا Hwasong-11 Ra تاكتيكالىق بالليستيكالىق زىمىرانىنا ورناتىلعان كاسسەتالىق وقتۇمسىقتى سىناعان ەدى. سول سىناقتى ەل باسشىسى كيم چەن ىن مەن ونىڭ قىزى چجۋ ە باقىلاعان. سول كەزدە زىمىران جۇيەسىنە ورناتىلعان كاسسەتالىق جانە جارىقشاقتى مينا وقتۇمسىقتارىنىڭ جويقىن كۇشى تەكسەرىلگەن.
ەسكە سالا كەتسەك، 29 -قازان كۇنى سولتۇستىك كورەيا ونعا جۋىق بالليستيكالىق زىمىران ۇشىرعانىن حابارلادىق.
ال ارتىنشا ا ق ش سولتۇستىك كورەياعا قارسى جاڭا سانكسيالار ەنگىزدى.