سوعىس بولىپ جاتقان يران مەن يزرايل ەلدەرىندە قانشا قازاقستان ازاماتى بار

استانا. KAZINFORM - قازاقستان سىرتقى ىستەر مينيسترلىگى تاياۋ شىعىستاعى جاعدايدى ەرەكشە باقىلاۋدا ۇستاپ وتىر. بۇل تۋرالى س ءى م رەسمي وكىلى ايبەك سمادياروۆ مالىمدەدى.

- اتالعان وڭىردەگى قازاقستاننىڭ ديپلوماتيالىق وكىلدىكتەرى كۇشەيتىلگەن رەجيمدە جۇمىس ىستەپ جاتىر. قولدا بار مالىمەت بويىنشا، قازىرگى ۋاقىتتا يراندا 132، ال يزرايلدە 219 قازاقستان ازاماتى بار. ديپلوماتتار وتانداستارىمىزبەن تۇراقتى بايلانىستا، - دەدى ايبەك سمادياروۆ.

ونىڭ ايتۋىنشا، قازىرگى كۇردەلى جاعدايدا اتالعان ەلدەردە جۇرگەن ازاماتتارعا اسا قاجەتتىلىك بولماسا، تۇرعان جەرىنەن شىقپاۋعا كەڭەس بەرىلەدى.

- قاۋىپسىزدىك شارالارىن قاتاڭ ساقتاۋعا، قىراعىلىق پەن ساقتىق تانىتۋعا، رەسمي اقپارات كوزدەرىنەن جاڭالىقتاردى قاداعالاۋعا جانە جەرگىلىكتى بيلىك ورگاندارىنىڭ نۇسقاۋلارىن بۇلجىتپاي ورىنداۋعا شاقىرامىز، - دەپ ەسكەرتتى س ءى م رەسمي وكىلى.