سوڭعى ەكى اپتادا ءۇش قايعىلى وقيعا: تاراز جانە شۋ اكىمدەرىنە سوگىس بەرىلدى

تاراز. KAZINFORM - جامبىل وبلىسىنىڭ اكىمى ەربول قاراشوكەيەۆ بالالار مەن جاسوسپىرىمدەر اراسىنداعى قۇقىق بۇزۋشىلىقتىڭ جيىلەنىپ كەتۋىنە بايلانىستى شۇعىل كەڭەس وتكىزدى، دەپ حابارلايدى وبلىس اكىمىنىڭ باسپا ءسوز قىزمەتى.

- جاڭا وقۋ جىلى باستالعالى بەرى وڭىردە كامەلەتكە تولماعاندار اراسىندا اسا اۋىر قىلمىستاردىڭ جيىلەپ كەتۋى - جاعدايدىڭ ۋشىعىپ بارا جاتقانىن كورسەتەدى. بۇل ماسەلەگە شۇعىل ءارى ناقتى شارالار قاجەت. بالا - ءبىزدىڭ بولاشاعىمىز! ەرتەڭىمىزدىڭ جارقىن بولۋى ءۇشىن ءبىز ولاردىڭ قاۋىپسىزدىگى مەن تاربيەسىنە، الاڭسىز ءبىلىم الۋىنا بارىنشا جاعداي جاساۋعا ءتيىسپىز. سىزدەردى تىڭداساق، بارلىق جۇمىستار ءجۇرىپ جاتىر، اۋقىمدى شارالار اتقارىلىپ جاتىر دەيسىزدەر. ءبىراق، ناتيجەسىن وزدەرىڭىز كورىپ وتىرسىزدار. سوڭعى ەكى اپتادا ءۇش قايعىلى جاعداي بولدى. دەمەك، سىزدەردىڭ جۇمىس تاسىلدەرىڭىز ءتيىمسىز. وقۋشىلاردىڭ تاربيەسى جونىندە مەكتەپ، اتا-انا، قوعام ۇشتىگىنىڭ ءوزارا بىرلەسكەن جۇمىستارىن باسىنان قاراۋ كەرەك! قازىرگى بالالاردىڭ كۇن سايىن وي- ءورىسى وزگەرىسكە ۇشىراپ، كوزقاراسى باسقاشا قالىپتاسۋدا. سوندىقتان، بۇل باعىتتاعى جۇمىس ءتاسىلىمىز دە جاڭاشا سيپاتتا قارقىن الۋ كەرەك دەپ ويلايمىن! - دەي كەلە وبلىس اكىمى ناتيجەسىز جۇمىستاردى سىنعا الدى.

ءوڭىر باسشىسى بۇعان دەيىن اتالعان ماسەلە بويىنشا ناقتى تاپسىرمالار بەرگەنىن، الايدا جاۋاپتى تۇلعالاردىڭ قابىلداعان شارالارىنان ناقتى ناتيجە كورمەي وتىرعانىن قاتاڭ تۇردە ەسكەرتتى.

سونىمەن بىرگە ءار اۋىلدىق وكرۋگتىڭ جەكە ءوز ۋچاسكەلىك پوليتسيا ينسپەكتورى بولۋى ءتيىس ەكەنىن العا تارتىپ، بوس شتاتتاردى شۇعىل تولىقتىرۋدى جۇكتەدى.

ەربول قاراشوكەيەۆ ورىن العان ماسەلەلەرگە قاتىستى لاۋازىمدى تۇلعالارعا تارتىپتىك سيپاتتاعى شەشىمدەر قابىلدادى.

- وبلىس اكىمى اپپاراتىنا وبلىس اكىمىنىڭ ورىنباسارى سەرىك سالەموۆكە «سوگىس»، تاراز قالاسىنىڭ اكىمى باقىتجان ورىنبەكوۆكە، شۋ اۋدانىنىڭ اكىمى باقىتجان جانىبەكوۆكە، ءبىلىم باسقارماسىنىڭ باسشىسى نۇربەك ورشىبەكوۆكە، سونداي-اق الەۋمەتتىك سالاعا جاۋاپتى تاراز قالاسى اكىمىنىڭ ورىنباسارى ۇلانا سلامبەكوۆا مەن شۋ اۋدانى اكىمىنىڭ ورىنباسارى نايمان سۇلتانبايەۆقا «قاتاڭ سوگىس» تۇرىندەگى تارتىپتىك شارا قابىلداۋ تاپسىرىلدى. ءبىلىم باسقارماسىنان تاراز قالالىق جانە شۋ اۋداندىق ءبىلىم بولىمدەرىنىڭ باسشىلارىنىڭ جانە وزگە دە جاۋاپتى تۇلعالاردىڭ اتقارىپ وتىرعان قىزمەتىنە سايكەستىگىن قاراستىرۋدى تالاپ ەتتى. وبلىس اكىمى جاسوسپىرىمدەر اراسىنداعى قىلمىستىڭ الدىن الۋ بويىنشا شۇعىل زەردەلەۋ توبىن قۇرىپ، ءار ءبىلىم بەرۋ مەكەمەسىندە كەڭەيتىلگەن ساۋالناما جۇرگىزىپ، ونىڭ ناتيجەسى بويىنشا ءتيىستى جۇمىستاردى جەدەل ۇيىمداستىرۋدى مىندەتتەدى، - دەلىنگەن اكىمدىك تاراتقان اقپاراتتا.

ۆەدومستۆو اتاپ وتكەندەي، بۇل قۇرىلاتىن توپ وڭىردەگى بارلىق مەكتەپتىڭ جوعارى سىنىپ وقۋشىلارى مەن كوللەدج ستۋدەنتتەرىنىڭ قۇقىقتىق ساۋاتتىلىعىن ارتتىرۋعا، قىلمىستىڭ سالدارى مەن زاردابىن تۇسىندىرۋگە كۇش سالۋى ءتيىس. توپ جەتەكشىسى رەتىندە تاراز قالاسى جانە اۋدان اكىمدەرى جەكە جاۋاپ بەرەتىن بولادى.

وسىعان دەيىن حابارلانعانداي، 13- قىركۇيەكتە جامبىل وبلىسىندا جاسءوسپىرىم مەرت بولدى. جاراقات العان وقۋشىنى ۇيىنە جەتكىزگەنىمەن، جەدەل جاردەم كەلگەنشە ول كوز جۇمدى.

سونداي-اق، جاقىندا تارازداعى مەكتەپ-ينتەرناتتا قىز بالاعا جاسالعان قورلىق تۋرالى دا حابارلانعان ەدى.

بۇدان بولەك تالاس اۋدانىندا كامەلەتكە تولماعان بالالار ۆيدەوۇندەۋ جازىپ، وگەي اكەسى وزدەرىن ءماجبۇرلى جۇمىسقا جەككەنىن، قورلىق كورىپ، سوققىعا جىعىلعاندارىن ايتقان.