سوڭعى جىلدارى ۇلتتىق ۇلان قاتارىنداعى 58 اسكەري قىزمەتشى مەرت بولدى
استانا. قازاقپارات - 3 جىل 9 ايدا ۇلتتىق ۇلان قاتارىنداعى 58 اسكەري قىزمەتشى مەرت بولدى. بۇل تۋرالى بۇگىن AMANAT پارتياسىندا وتكەن ءىس-شارادا ۇلتتىق ۇلان باس قولباسشىسىنىڭ ورىنباسارى، گەنەرال-مايور قايرات ۇمبەتوۆ ايتتى.
«ۇلتتىق ۇلان قاتارىندا سوڭعى 3 جىل مەن 2024 -جىلدىڭ 9 ايىندا 58 اسكەري قىزمەتشى قايتىس بولسا، ونىڭ 11- ءى قاتارداعى سارباز. قالعاندارى وفيتسەرلەر مەن كەلىسىمشارت بويىنشا قىزمەتشىلەر. 2022 -جىلى 2 سارباز قاڭتار وقيعاسى كەزىندە جاۋىنگەرلىك قىزمەتىن اتقارۋ كەزىندە قازا بولدى. قايعىلى وقيعا سالدارىنان ەكى اسكەري قىزمەتشى مەرت بولدى. ولار كەلىسىمشارت بويىنشا قىزمەت اتقارعان. نەگىزگى سەبەبى - دەمالىس كەزىندە نەمەسە قىزمەتتەن بوس ۋاقىتىندا ءوز كولىگىندە نە جولاۋشى رەتىندە جول-كولىك وقيعاسىندا قازا بولۋى»، - دەدى ول.
باس قولباسشى ورىنباسارىنىڭ دەرەگىنشە، جوعارىدا اتالعان مەرزىمدە 29 قىزمەتى ناۋقاستانىپ ومىردەن وزعان. ولاردىڭ ىشىندە 4 سارباز بار. مۇنان بولەك، تاعى ءبىر اسكەري قىزمەتشى ۇيىندە توق سوعىپ مەرت بولعان. بيىل وتباسىمەن دەمالىستا بولعان كەلەسى اسكەري قىزمەتشى سۋعا باتىپ كەتكەن.
اۆتور
مارلان جيەمباي