سوڭعى ءۇش جىلدا ەلگە 1,12 تريلليون تەڭگە زاڭسىز اكتيۆتەر قايتارىلدى - انتيكور

استانا. KAZINFORM - ەلىمىزدەن زاڭسىز شىعارىلعان اكتيۆتەردى قايتارۋ شاراسى جالعاسىپ جاتىر. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.

- زاڭسىز شىعارىلعان اكتيۆتەردى قايتارۋ بويىنشا جۇمىس قوعامنىڭ مەملەكەتتىك ينستيتۋتتارعا دەگەن سەنىمىن ارتتىرۋعا باعىتتالعان نەگىزگى مىندەتتەردىڭ ءبىرى بولىپ قالا بەرەدى. 2022 -جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1,12 تريلليون تەڭگەدەن استام اكتيۆ قايتارىلدى، - دەدى دانيار بيگايداروۆ ۆەدومستۆودا وتكەن باسپا ءسوز ءماسليحاتىندا.

رەسمي وكىلدىڭ ايتۋىنشا، قىلمىستىق جولمەن الىنعان قاراجات پەن مۇلىكتى ىزدەستىرۋ جۇمىستارى ەل ىشىندە دە، شەتەلدە دە جۇرگىزىلىپ جاتىر.

- وسى ماقساتتا قارجىلىق مونيتورينگ اگەنتتىگىنىڭ بارلاۋ بولىمشەلەرىمەن، سونداي-اق حالىقارالىق سەرىكتەستەرمەن بەلسەندى ىنتىماقتاستىق ورناتىلىپ، بەيرەسمي بايلانىس ارنالارى مەن باسقا دا جەلىلەر پايدالانىلىپ جاتىر. بۇل ۇرلانعان قاراجاتتى جەدەل انىقتاۋعا جانە قايتارۋعا مۇمكىندىك بەرەدى، - دەيدى ول.

وتكەن جىلى قايتارىلعان قارجىعا 92 مىڭ ورىندىق 83 مەكتەپ سالىناتىنى تۋرالى حابارلاعان ەدىك.

بىلتىر قايتارىلعان اكتيۆتەر: Cartier ،Breguet ،Tiffany ،Ulysse Nardin Classic قول ساعاتتارى اۋكسيونعا شىعارىلاتىنى ايتىلدى.

اۆتور

داۋلەت ىزتىلەۋ