سوڭعى 5 جىلدا قازاقستانداعى تۋريستەر سانى 7,5 ەسە ءوستى - ۇكىمەت
استانا. KAZINFORM – ق ر پرەمەر-ءمينيسترى ولجاس بەكتەنوۆ ەلدەگى تۋريزم سالاسىن دامىتۋ جانە سيفرلاندىرۋ تۋرالى ۇكىمەت وتىرىسىن وتكىزدى.
- قازاقستان - تاريحى تەرەڭ، تابيعاتى اسەم، مادەنيەت پەن سالت-داستۇرگە باي مەملەكەت. ۇلان-عايىر دالامىزدىڭ ءار قيىرىندا تۋريستەردى قىزىقتىراتىن كورىكتى جەرلەر كوپ. سوندىقتان تۋريزم ەل ەكونوميكاسىنىڭ وسۋىنە جاڭاشا سەرپىن بەرەتىن سالاعا اينالۋى قاجەت. بۇل رەتتە، قازاقستانداعى تۋريزمنىڭ دامۋ الەۋەتى - وتە جوعارى. سوڭعى 5 جىلدا تۋريستەردىڭ سانى 7,5 ەسەگە ءوستى. بىلتىر ەلىمىزگە 15 ميلليوننان استام ادام ساياحاتتاپ كەلدى، − دەدى و. بەكتەنوۆ ۇكىمەتتىڭ بۇگىنگى وتىرىسىندا.
پرەمەردىڭ ايتۋىنشا، پرەزيدەنت تاپسىرماسىمەن وسى سالادا ءىرى ينۆەستيتسيالىق جوبالار قولعا الىندى. الماتى قالاسى مەن الماتى وبلىسىندا تاۋ كلاستەرىن دامىتۋ جۇمىستارى بەلسەندى ءجۇرىپ جاتىر. شىعىس قازاقستان - تاۋ شاڭعىسى مەن تابيعي تۋريزمدى دامىتۋعا قولايلى ءوڭىر.
شۋچە- بۋراباي كۋرورتتىق ايماعىندا جىل بويى جۇمىس ىستەيتىن تۋريستىك وبەكتىلەر قۇرۋعا جانە ەكولوگيالىق، سپورتتىق ءتۋريزمدى دامىتۋعا مۇمكىندىك بەرەتىن اۋقىمدى جاڭعىرتۋ جۇمىستارىن جۇرگىزۋ جوسپارلانعان.
اقتاۋ ماڭىنداعى «جىلى جاعاجايدا» بەس جۇلدىزدى قوناق ءۇي مەن ويىن-ساۋىق پاركىن سالۋ جوبالارى جۇرگىزىلدى. وسى وڭىردەگى كەندىرلى كۋرورتتىق ايماعىندا اۋەجاي سالىنادى.
- بۇگىندە ءىس-شارالىق جانە مادەني تۋريزم بەلسەندى دامىپ كەلەدى. ەلىمىزدە كوپتەگەن مادەني جانە سپورتتىق ءىس-شارالار، بيزنەس-فورۋمدار ءوتىپ جاتىر. بارلىق مۇددەلى مەملەكەتتىك ورگان وسىنداي اۋقىمدى ءىس-شارالاردى تۋريستەردى تارتۋعا بەيىمدەۋ ءۇشىن ناقتى تەتىكتەردى ازىرلەۋى كەرەك. وتكەن جىلى «Your tourist pass» جوباسى باستالدى. بۇل قۇرال QR- كودتى سكانەرلەۋ ارقىلى ۇلتتىق تۋريستىك پورتالدى، e-Qonaq كوشى-قون سەرۆيسىن، تاكسي قىزمەتىن جانە باسقا دا پايدالى رەسۋرستاردى قولجەتىمدى ەتەدى. بۇعان قوسا، الەمنىڭ كوپتەگەن ەلىندە كەڭىنەن تانىمال «Tax FreE» پيلوتتىق جوباسى دا جاقسى ناتيجە كورسەتىپ وتىر، − دەدى ولجاس بەكتەنوۆ.
ايتا كەتەيىك، وتكەن جىلى ۇلى جىبەك جولىنىڭ بويىمەن وتەتىن «جىبەك جولى» تۋريستىك پويىزى ىسكە قوسىلدى جانە 125 تەمىرجول ۆوكزالىن اۋقىمدى جاڭعىرتۋ جۇمىستارى باستالدى. الماتى، شىمكەنت جانە قىزىلوردا اۋەجايلارىنىڭ جاڭا تەرمينالدارى سالىندى.
- كوشى-قون راسىمدەرىن وڭايلاتۋ شارالارى قولعا الىندى. ماسەلەن، شەكارا بەكەتتەرىندە ۇيىمداسقان تۋريستىك توپتاردى كەزەكسىز وتكىزۋ بويىنشا پيلوتتىق جوبا ىسكە قوسىلدى. بۇل شارا پاسپورتتىق باقىلاۋدان ءوتۋ ۋاقىتىن 5 ەسە قىسقارتۋعا مۇمكىندىك بەردى، - دەدى ۇكىمەت باسشىسى.
بۇعان دەيىن اقمولا وبلىسىنىڭ اكىمى مارات احمەتجانوۆ بۋراباي كۋرورتتىق ايماعىن دامىتۋ ءۇشىن 2025-2029-جىلدارعا ارنالعان كەشەندى جوسپار تۋرالى ايتىپ بەرگەن ەدى.
«استانا كونسەرت» كومپانياسىنىڭ پروديۋسەرى مالىك حاسەنوۆ امەريكالىق اكتريسا جانە ءانشى دجەننيفەر لوپەستىڭ استانادا وتەتىن كونسەرتىنەن قانشا ەكونوميكالىق پايدا تۇسەتىنىن ايتتى.