سوڭعى 24 ساعات ىشىندە گازادا 28 پالەستينالىق كوز جۇمدى
استانا. KAZINFORM -يزرايلدىڭ گازا سەكتورىنا جاساعان شابۋىلىنان سوڭعى 24 ساعاتتا 28 ادام قازا تاۋىپ، 85 ادام جارالاندى، دەپ جازادى انادولى.
يزرايل ايماققا 355 كۇننەن بەرى توقتاۋسىز شابۋىل جاساپ جاتىر.
گازا سەكتورىنداعى شابۋىلدار 2023 -جىلدىڭ 7-قازانىندا باستالعاننان بەرى قازا تاپقانداردىڭ جالپى سانى 41495 كە، جارالانعاندار سانى 96006 عا جەتتى.
قازا تاپقانداردىڭ مايىتتەرى ءالى دە قيراعان عيماراتتاردىڭ قيراندىلارى مەن جول جيەكتەرىندە جاتىر. جەدەل جاردەم بريگادالارى مەن ازاماتتىق قورعانىس قىزمەتكەرلەرى يزرايل كۇشتەرىنىڭ كەدەرگىلەرىنەن ولارعا جەتە الماي وتىر، دەپ قوستى گازا سەكتورىنداعى دەنساۋلىق ساقتاۋ مينيسترلىگى.
ايتا كەتەيىك، بىرىككەن اراب امىرلىكتەرى گازا سەكتورىنىڭ 100 گە جۋىق جارالى جانە اۋىر ناۋقاسقا شالدىققان تۇرعىنىن جانە ولاردىڭ 155 وتباسى مۇشەسىن ءوز اۋماعىنا كوشىردى.